Wednesday, August 19, 2020

ကမ္ဘောဇဘဏ် ငွေစာရင်းကွဲလွဲတဲ့ ဖြစ်စဉ်တွေကြောင့် ရဲစခန်းမှာ အမှုဖွင့်တိုင်တန်းပြီး ဖြေရှင်းနေရ

စစ်ကိုင်းတိုင်း ၊ခန္တီးမြို့ ကမ္ဘောဇဘဏ်က ဒုတိယဘဏ်ခွဲ တာဝန်ခံ ကြီးကြပ်ရေးမှူးဟာ ငွေစာရင်းတွေ ခွင့်ပြုချက်မရှိဘဲ သိန်းငါးထောင်နီးပါး အကြိမ်ကြိမ်ထုတ်ယူကာ ကိုယ်ကျိုးအတွက် သုံးစွဲခဲ့တာကြောင့် ကမ္ဘောဇဘဏ်ရဲ့ စစ်ကိုင်းတိုင်းနဲ့ ချင်းပြည်နယ် ဒေသ(၄)တာဝန်ခံ လက်ထောက်မန်နေဂျာက မုံရွာမြို့မရဲစခန်းမှာ တရားလိုပြုလုပ်ပြီး အမှုဖွင့်တိုင်တန်းခဲ့တယ်လို့ သိရပါတယ်။
အဲ့ဒီအမှုကို မုံရွာမြို့မရဲစခန်းက ပထမသတင်းပေး တိုင်တန်းချက်အမှတ် ၇၂၁ / ၂၀၂၀ ရာဇသတ်ကြီး ဥပဒေပုဒ်မ- ၄၀၈ အရ အမှုကို လက်ခံရေးဖွင့်ပြီး အမှုကို စစ်ဆေးဆောင် ရွက်နေဆဲ ဖြစ်တယ်လို့ သိရပါတယ်။
မုံရွာတရားရုံးမှာ အမှုတွဲလျှောက်လွှာ စာရေးလုပ်ကိုင်နေသူတစ်ဦးက “ အဲ့ဒီ ဘဏ်ကိစ္စနဲ့ ပတ်သက်လို့ မနေ့က နေ့လည်မှာ ကောင်လေးတစ်ယောက်ကို တရားရုံးမှာ ချုပ်မိန့် တောင်းခံဖို့ ရီမန်လာယူတာရှိတယ် ” လို့ပြောပါတယ်။
မုံရွာက ကမ္ဘောဇဘဏ်ခွဲ(၁)မှာ ငွေစုစာရင်းဖွင့်ထားတဲ့ စာရင်းပိုင်ရှင်ဖြစ်သူ အမျိုးသားတစ်ဦးရဲ့ ငွေစုစာ ရင်းစာအုပ်ကို စာရင်းပိုင်ရှင်ဖြစ်ရဲ့ ညီဖြစ်သူက Update လုပ်ဖို့ ဘဏ်ကိုလာရောက်ချိန် ဘဏ်ရဲ့ System ရှိ စာရင်းလက်ကျန်နဲ့ စာရင်းပိုင်ရှင်ရဲ့ ငွေစုစာရင်းလက်ကျန်မှာ တူညီမှုမရှိတဲ့အပြင် စာရင်းပိုင်ရှင်မှ ငွေထုတ် ယူမှုမရှိဘဲ ငွေတွေလျော့နည်းနေတာကို တာဝန်ခံမန်နေဂျာက သိခဲ့ရပြီး ရုံးချုပ်တာဝန်ရှိသူ အသီးသီးကို ဆက်လက်တင်ပြခဲ့ရာ ရုံးချုပ်က စုံစမ်းစစ်ဆေးရေးအဖွဲ့ ဖွဲ့ကာ အဲ့ဒီ ငွေစာရင်းကွာဟနေမှုကို စုံစမ်းစစ်ဆေးခဲ့တယ်လို့ သိရပါတယ်။
အဲ့ဒီအဖွဲ့ရဲ့ စစ်ဆေးပေါ်ပေါက်ချက်အရ ခန္တီးမြို့ ကမ္ဘောဇဘဏ် ဒုတိယဘဏ်ခွဲ တာဝန်ခံ ကြီးကြပ်ရေးမှူး ဦးပြည့်ဖြိုးဦး ဆိုသူဟာ Mobile Service လုပ်ကိုင်သူ လူတစ်ဦးနဲ့ ငွေကြေးချိတ်ဆက်မှုတွေပြုလုပ်ကာ ငွေစာရင်းလွဲပြောင်းမှုတွေ အကြိမ်ကြိမ် ပြုလုပ်ပြီး ထုတ်ယူခဲ့တာဖြစ်တယ်လို့ သိရပါတယ်။
ဒါ့အပြင် မုံရွာ ကမ္ဘောဇဘဏ်ခွဲ(၁)မှာ ငွေစုစာရင်းဖွင့်ထားသူ တစ်ဦးရဲ့ အမည် ၊ မှတ်ပုံတင်နံပါတ်ပါတဲ့ ယာဉ်မောင်းလိုင်စင်ကို အသုံးပြုပြီး မန္တလေးဘဏ်ခွဲ (၂၀)ကနေ ငွေကြေးထုတ်ယူခဲ့တာကိုလည်း စစ်ဆေးတွေ့ရှိခဲ့တယ်လို့ ဘဏ်လုပ်ငန်းလုပ်နေတဲ့ အသိုင်းအဝန်းကနေ သိရပါတယ်။
ဘဏ်ခွဲတာဝန်ခံ ကြီးကြပ်ရေးမှူးကိုယ်တိုင်က မသမာမှုပြုလုပ်ကာ ငွေကြေးထုတ်ယူတဲ့ ဖြစ်စဉ်နဲ့ ပတ်သက်လို့ မုံရွာ ကမ္ဘောဇဘဏ်ခွဲ (၁)ကို ( VOM) က ဆက်သွယ်ပေမယ့်လည်း ဆက်သွယ်လို့ မရခဲ့ပါဘူး။
မုံရွာ ကမ္ဘောဇဘဏ်ခွဲ(၁)မှာ အဲ့ဒီလို ငွေစုစာရင်းပိုင်ရှင်ရဲ့ငွေစုစာရင်းတွေနဲ့ ဘဏ်မှာရှိတဲ့ငွေလက်ခံစာရင်း တွေဟာ တူညီမှုမရှိဘဲ ကွဲလွဲနေတဲ့ ဖြစ်စဉ်က ဒီတစ်ကြိမ်တည်းဖြစ်ခဲ့တာမဟုတ်ဘူးလို့လည်း သိရပါတယ်။
၂၀၁၇ခုနှစ် စက်တင်ဘာ ၂၇ ရက်က ယင်းမာပင်ခရိုင် ၊ပုလဲမြို့နယ်၊ မုံသွင်ကျေးရွာက အမျိုးသားတစ်ဦးဟာ မုံရွာ ကမ္ဘောဇဘဏ်ခွဲ(၁) မှာ ငွေကျပ် သိန်း ၂၀၀ နဲ့ ငွေစုစာရင်း စတင်ဖွင့်လှစ်ခဲ့ပြီး နောက်တစ်နှစ် အောက် တိုဘာ ၁ ရက်နေ့ အထိ အကြိမ်ကြိမ် အခါခါ ငွေစုစာရင်းထဲကို သိန်း ၈၀၀ ကျော်ထည့်ကာ စာရင်းဖွင့်စုဆောင်းခဲ့တယ်လို့ သိရပါတယ်။
အဲ့ဒီလမှာဘဲ ငွေစာရင်းပိုင်ရှင်ဖြစ်သူက သူ့ရဲ့ ငွေစုစာရင်းကို သိလိုတဲ့အတွက် ဘဏ်က Update လုပ် စစ် ဆေးကြည့်တဲ့အခါ ငွေစုစာရင်းပိုင်ရှင်ဖြစ်သူက တကြိမ်တခါမှ ငွေကြေးထုတ်ယူခြင်းမရှိဘဲ သိန်း ၅၀၀ နီး ပါး စာရင်းကွာဟနေတဲ့အတွက် ငွေစာရင်းပိုင်ရှင်ဖြစ်သူကိုယ်တိုင်က တရားလိုပြုလုပ်ပြီး အဲ့ဒီဘဏ်က တာ ဝန်ခံမန်နေဂျာ အမျိုးသမီးကို မုံရွာမြို့မရဲစခန်းမှာ အမှုဖွင့်တိုင်တန်းခဲ့တဲ့ ဖြစ်စဉ်လည်း ဖြစ်ခဲ့ဖူးပါတယ်။
အဲ့ဒီအမှုကိုတော့ ရဲစခန်းက (ပ) ၁၀၆၂/၂၀၁၉ ရာဇ သတ်ကြီး ဥပဒေ ပုဒ်မ ၄၀၆ အရ အမှုဖွင့်ခဲ့တယ်လို့လည်း သိရပါတယ်။
Ref ; Voice of Myanmar

0 comments:

Post a Comment