Sunday, August 16, 2020

အိန္ဒိယနိုင်ငံ၏ စစ်အင်အား တိုးမြှင့်သွားမှာဖြစ်ကြောင်း လွတ်လပ်ရေးနေ့မှာ ဝန်ကြီးချုပ် မိုဒီ ကတိပြု

အိန္ဒိယ-တရုတ် နှစ်နိုင်ငံကြား နယ်စပ်တင်းမာမှု အကြီးအကျယ် ဖြစ်ခဲ့တာနဲ့ ပတ်သက်လို့ အိန္ဒိယဝန်ကြီးချုပ် Narendra Modi က သူ့ရဲ့ လွတ်လပ်ရေးနေ့ မိန့်ခွန်းမှာ တရုတ်နိုင်ငံကို အထူးသတိပေး ပြောကြားလိုက်ပြီး အိန္ဒိယမှာ ခုထက် ပိုအားကောင်းတဲ့ စစ်တပ်ကို တည်ဆောက်သွားမယ်လို့ ကတိပေးလိုက်ပါတယ်။
တင်မားမှုဖြစ်နေတဲ့ နှစ်ဖက်နယ်စပ် ဟိမဝန္တာဒေသမှာ စစ်အင်အား တိုးချဲ့နေတာကို ရည်ညွှန်းရင်း ဝန်ကြီးချုပ် Modi က ခုလို ပြောသွားတာပါ။
အိန္ဒိယရဲ့ အချုပ်အခြာ အာဏာကသာ အရေးကြီးဆုံးဖြစ်ပြီး အိမ်နီးချင်းတွေနဲ့ ဆက်ဆံရေးက လုံခြုံရေးနဲ့ အပြန်အလှန် ယုံကြည်မှုပေါ်မှာသာ မူတည်လိမ့်မယ်လို့လည်း ပြောပါတယ်။
လွတ်လပ်ရေးနေ့ အခမ်းအနားကို နယူးဒေလီမြို့က သမိုင်းဝင် Red Fort ခံတပ်ဟောင်းမှာ ကျင်းပခဲ့ပြီး ကိုဗစ်ကြောင့် နဂို တက်ရောက်ဖို့ စီစဉ်ထားတဲ့ လူဦးရေရဲ့ ထက်ဝက်လောက်ဖြစ်တဲ့ ၄,၀၀၀ လောက်သာ တက်ရောက်ခဲ့တာပါ။ တဦးနဲ့တဦးကြား ၆ ပေအကွာမှာ ထိုင်ခဲ့ကြပါတယ်။
ဟိန္ဒူအမျိုးသားရေးဝါဒီ တဦးဖြစ်တဲ့ ဝန်ကြီးချုပ် Modi က အိန္ဒိယနဲ့ နယ်စပ်တင်းမာမှု ဖြစ်နေတဲ့ ပါကစ္စတန်၊ တရုတ်တို့နဲ့ ပတ်သက်ပြီး သူ့မိန့်ခွန်းထဲ ပြောသွားပေမယ့် နိုင်ငံအမည်တွေကို အတိအကျ ရည်ညွှန်း ပြောသွားတာမျိုးတော့ မရှိခဲ့ပါဘူး။
“အိန္ဒိယရဲ့ တည်တံ့ခိုင်မြဲမှုက အရေးအပါဆုံးဖြစ်ပြီး ပြီးခဲ့တဲ့ ဇွန်လ ၁၅ ရက်နေ့ ဟိမဝန္တာဒေသက Ladakh မှာ ကျနော်တို့တွေ ဘာလုပ်နိုင်တယ်၊ အိန္ဒိယစစ်သားတွေ ဘယ်လို စွမ်းဆောင်နိုင်ခဲ့တယ်ဆိုတာ အားလုံး မြင်တွေ့ရမှာ ဖြစ်ကြောင်း” Modi က ပြောပါတယ်။ အဲဒီနယ်စပ် အပြန်အလှန် ပဋိပက္ခအတွင်း အိန္ဒိယစစ်သား ၂၀ သေဆုံးခဲ့ရပါတယ်။
နှစ်နိုင်ငံနယ်စပ် စစ်ရေးတင်းမာမှုအတွင်း ပိုင်နက်ဆုံးရှုံးမှု မရှိဘူးလို့ ဝန်ကြီးချုပ် Modi က ပြောနေပေမယ့် ဂြိုဟ်တုဓာတ်ပုံတွေအရ တရုတ် နယ်စပ်တပ်တွေဟာ အိန္ဒိယက သူတို့ပိုင်နက်လို့ ကြေညာထားတဲ့နေရာကို ဝင်ရောက်သိမ်းပိုက် နေရာယူထားတာ တွေ့ရတယ်လို့ စစ်ရေးကျွမ်းကျင်သူတွေက ပြောပါတယ်။
Crd : VOA

0 comments:

Post a Comment