Tuesday, July 21, 2020

Voice of Malikha News Agency၏ ဖားကန့်အခြေစိုက် သတင်းထောက်တစ်ဦး နေအိမ်အနီးရှိ စားသောက်ဆိုင်တွင် ဓားထိုးခံရ

ဖားကန့်အခြေစိုက် သတင်းထောက်ဖြစ်သော ဦးနောင်ရိုးသည် (ဇူလိုင် ၂၀ ရက်) ည ၉ နာရီက လုံးခင်း၊ မော်စီစာကျေးရွာ နေအိမ်အနီးရှိ စားသောက်ဆိုင်တွင် ဓားထိုးခံရကြောင်း သတင်းရရှိသည်။ ဓားထိုးမှုဖြစ်စဉ်အသေးစိတ်ကို မသိရှိရသေးသော်လည်း ဝမ်းဗိုက်နှင့် လက်တို့တွင် ဒဏ်ရာများရရှိခဲ့ပြီး လုံးခင်းဆေးရုံမှ ဖားကန့်ပြည်သူ့ဆေးရုံးကြီးသို့ လွဲပြောင်း ကုသမှုခံယူနေရကြောင်း သိရသည်။
သတင်းထောက် ဦးနောင်ရိုးသည် Voice of Malikha News Agency​ ၏ ဖားကန့်အခြေစိုက် သတင်းထောက်တစ်ဦးဖြစ်ပြီး ဖားကန့်ဖြစ်စဉ်များနှင့် ပတ်သက်၍ သတင်းရေးနေသူ တစ်ဦးဖြစ်ကြောင်း Voice Of Malikha News Agency ၏ တည်ထောင်သူ ဦးဝေဖြိုးအောင်က ဆိုပါသည်။
စုံစမ်းမှုများအရ ယနေ့ည ရှစ်နာရီကျော်ခန့်က ၄င်းနေထိုင်ရာ လုံးခင်းကျေးရွာ၊ အောင်သာယာ (၂) ရပ်ကွက်အတွင်းရှိ ၎င်းငှားနေထိုင်သောအိမ်အနီးမှ စားသောက်ဆိုင်တွင် ထိုင်နေစဉ် ယင်းအိမ်တွင် အတူငှားရမ်းနေထိုင်သူ တစ်ဦးဟု ယူဆရသူနှင့် အချင်းများခဲ့ကြောင်း သိရသည်။
ဓားထိုးခံရမှုကြောင့် ဦးနောင်ရိုး​၏ ညာရင်အုံတွင် ထိုးသွင်းဒဏ်ရာ တစ်ချက်၊ ဘယ်ဘက် လက်မောင်းတွင် ပြတ်ရှဒဏ်ရာ တစ်ချက်တို့ ရရှိခဲ့ကြောင်း သိရသည်။
အခင်းဖြစ်စဉ်နှင့် ပတ်သက်၍ Voice Of Malikha News Agency ၏ အယ်ဒီတာချုပ်ဖြစ်သူ ဦးဝေဖြိုးအောင်က " ကျွန်တော်တို့ ဖြစ်စဉ်ကို စုံစမ်းနေတယ်။ လောလောဆယ် ဓားဒဏ်ရာ နှစ်ချက် ရထားတယ်။ ဝမ်းဗိုက်ဒဏ်ရာက လုံးခင်းဆေးရုံမှာ အဆင်မပြေလို့ ဖားကန့်ဆေးရုံ လွဲလိုက်တယ်။ ဘယ်လောက်နက်လဲ မသိရသေးဘူး" ဟု ပြောကြားသည်။
ယင်းကိစ္စနှင့် ပတ်သက်၍ ဆောင်ရွက်စရာရှိသည်များကိုလည်း ဆောင်ရွက်မည်ဖြစ်ပြီး လက်ရှိတွင် ရဲတပ်ဖွဲ့သို့ အကြောင်းကြားထားကြောင်း သိရသည်။
Crd : Voice of Malikha News Agency

0 comments:

Post a Comment