Wednesday, July 15, 2020

ဘင်္ဂလားဒေ့ရှ်နိုင်ငံ ၃ ပုံ ၁ ပုံ ရေဘေးဒဏ် ခံနေရ

နိုင်ငံရဲ့ ၃ ပုံ ၁ ပုံလောက် ရေဘေးဒဏ်ခံနေရတဲ့ ဘင်္ဂလားဒေ့ရှ်နိုင်ငံရဲ့ တစ်ချို့နေရာဒေသတွေမှာ ရေ ပိုကြီးလာနေတာကြောင့် လူပေါင်း ၁သန်းကျော် ရေလွတ်ရာကုန်းမြင့်တွေကိုဆီကိုထွက်ပြေးသူက ပြေး၊မပြေးနိုင်တဲ့သူတွေကပိတ်မိနေတယ်လို့ ဘင်္ဂလားဒေ့ရှ်တာဝန်ရှိသူတွေနဲ့ စေတနာ့ရှင်ဝန်ထမ်းတွေက ပြောပါတယ်။
အင်္ဂါနေ့က ဘင်္ဂလားဒေ့ရှ်က ခရိုင် ၂၀မှာ အဓိကမြစ်ကြီးတွေရဲ့ ရေမျက်နှာပြင် မြင့်တက်နေပြီး နိုင်ငံ့အ လယ် မြောက်ပိုင်းမှာ Brahmaputra မြစ်က ပုံမှန်ထက် ၁၆ လက်မ မြင့်တက်နေတယ်လို့လည်း ခရိုင်အုပ် ချုပ်ရေးမှူး Farook Ahmed က AFP သတင်းဌာန ကို ပြောပါတယ်။
ပြီးခဲ့တဲ့လကတည်းက ရေစကြီးတာဖြစ်ပြီး တစ်ခဏ ရေကျသွားပြီးတဲ့နောက် အခုလို ပိုဆိုးလာတာလည်း ဖြစ်ပါတယ်။ စိုက်ခင်းသီးနှံတွေ ပျက်စီးသလို ဆင်းရဲတဲ့ဒေသအများစုက လူတွေ အိုးအိမ်စွန့်ပြီး ရေလွတ်ရာကို ပြေးကြရပါတယ်။
နိုင်ငံရဲ့ အနောက်မြောက်ဘက်နဲ့ အလယ်ပိုင်းမှာ ရေဘေးဒဏ် လောလောဆယ် သက်သာဖွယ် မရှိသေးဘူးလို့လည်း ဘင်္ဂလားဒေ့ရှ် ရေလွှမ်းမိုးမှု ခန့်မှန်း သတိပေးဌာနက ခန့်မှန်းထားပါတယ်။ အဲဒီဌာနက မိုးလေဝ သပညာရှင်တစ်ဦးကတော့ ဒီနှစ်ရေကြီးမှုက ဆယ်စုနှစ်အတွင်း အဆိုးဆုံး ဖြစ်နိုင်တယ်လို့ AFP သတင်းဌာနကို ပြောပါတယ်။
ပထမတစ်ကျော့ ရေကြီး ရေလျှံမှု လျော့မကျသွားခင်မှာ အိန္ဒိယနဲ့နယ်စပ် အထက်ပိုင်းမှာ ပြင်းပြင်းထန်ထန် ရွာတဲ့မိုးက နောက်တကျော့ ရေကြီးမှုကို ဖြစ်ပေါ်စေခဲ့တာပါ။ ဘင်္ဂလားဒေ့ရှ်အစိုးရက ရေဘေးခိုလှုံရေးစ ခန်း ၉၇၅ ခု ဖွင့်လှစ်ပေးခဲ့ပြီး ဆေးအဖွဲ့ ၁၇၅ ဖွဲ့ကို စေလွှတ်ခဲ့တယ်လို့ ကုလသမဂ္ဂရဲ့ Relief Web မှာ အ စီရင်ခံထားပါတယ်။
လာမယ့်ရက်တွေမှာလည်း ဘင်္ဂလားဒေ့ရှ်တစ်နိုင်ငံလုံးမှာ မိုးကြီးမှာ ဖြစ်လို့ အခြေအနေက ပိုဆိုး လာနိုင်ပါတယ်။ အလားတူပဲ အိန္ဒိယနိုင်ငံ အနောက်မြောက်ပိုင်း အာသံပြည်နယ်နဲ့ နီပေါနိုင်ငံတွေမှာလည်း မုတ်သုံမိုးကြီးတဲ့ ရေဘေးဒဏ် ခံစားနေရပါတယ်။
Ref ; VOA

0 comments:

Post a Comment