Saturday, July 18, 2020

နိုင်ငံအတွက် သတ်မှတ်တန်ချိန်ပြည့်ပြီဖြစ်သဖြင့် ဆန်စပါးအသင်းချုပ်မှ အရန်ဆန်ဝယ်ယူမှုအား ယာယီရပ်ဆိုင်း

အစိုးရရဲ့ အရေးပေါ် ရိက္ခာဆန် ဝယ်ယူတဲ့အစီအစဉ်မှာ သတ်မှတ်ထားတဲ့ဆန်တန်ချိန် ပမာဏပြည့်သွားပြီဖြစ်လို့ အရန်ဆန်ဝယ်ယူတာ ယာယီရပ်ဆိုင်းလိုက်ကြောင်းသိရသည်။
COVID-19 ကပ်ရောဂါကာလ ပြည်တွင်းမှာ အရေးပေါ်ရိက္ခာ ဖူလုံမှုရှိစေဖို့ အရန်ဆန်ဝယ်ယူတာ ဧပြီလကုန်ပိုင်းလောက်ကစတင်ခဲ့ပြီး တန်ချိန် ၅၀,၀၀၀ ပြည့်သွားပြီဖြစ်လို့ အရန်ဆန်ဝယ်ယူတာကို ယာယီရပ်ဆိုင်းလိုက်ပြီလို့ စီးပွားရေးနဲ့ ကူးသန်းရောင်းဝယ်ရေး ဝန်ကြီးဌာန လက်ထောက်အတွင်းဝန် ဦးခင်မောင်လွင်က ပြောပါတယ်။
“အရေးပေါ်ရိက္ခာဆန်ဆိုတာ တနိုင်ငံလုံးအတိုင်းအတာနဲ့ တပတ် - ၁ဝရက်စာကို ရည်မှန်းပြီးတော့ အရန်ဆန်တန်ချိန် ၅၀,၀၀၀ ကို အရေးပေါ်ရိက္ခာ အနေနဲ့ဝယ်ယူဖို့ စီစဉ်ခဲ့တာပေါ့။ တကယ်လို့သာ ကိုဗစ်ကြောင့် ရောဂါပြန့်ပွားမှုတွေ မြင့်လာမယ်ဆိုရင် ဒီစားနပ်ရိက္ခာအပေါ် ခွဲတမ်းစနစ်နဲ့ ဆောင်ရွက်နိုင်ဖို့အတွက် အရေးပေါ်ရိက္ခာဆန်တန်ချိန် ၅၀,၀၀၀ ကတော့ ဝယ်ယူလက်ခံပြီးသွားပြီပေါ့။ လက်ရှိမှာ အရန်ဆန်ပေးသွင်းတဲ့ကိစ္စကို လာမယ့်အပတ်ထဲမှာ ဘယ်လိုပေးသွင်းသွားမယ်ဆိုတဲ့ဟာမျိုး ဆက်ဆွေးနွေး သွားဖို့ရှိတယ်။”
ဆန်ပြည်ပတင်ပို့မှု ပမာဏရဲ့ ၁၀ရာခိုင်နှုန်းကို နိုင်ငံတော်ရိက္ခာဆန်အတွက် ဧပြီလကစပြီး ကုန်သည်တွေဆီကဝယ်ယူနေတာကို ဒီလထဲမှာပဲ ၅ ရာခိုင်နှုန်း လျှော့ချဝယ်ယူခဲ့ပြီး အခုနောက်ဆုံး အဝယ်တွေကို ရပ်လိုက်တာပါ။ အခုလို ပြည်ပရောင်းချမယ့် ဆန်တွေထဲက သတ်မှတ်ဈေးနဲ့ ဝယ်ယူနေတာတွေကို ရပ်ဆိုင်းလိုက်တဲ့အတွက် ကုန်သည်တွေအတွက်တော့ ပိုအဆင်ပြေသွားတယ်လို့ မူဆယ်ဆန်ကုန်စည်ဒိုင် ဥက္ကဌ ဦးမင်းသိန်းက ဆိုပါတယ်။
“မူဆယ်ကနေ ရှမ်းမြောက်ဆိုပြီးတော့ ကျနော်တို့က အများပိုင်ကုမ္ပဏီရှိတယ်။ အများပိုင်ကုမ္ပဏီကနေ တရုတ်ကိုဆန်ပို့တော့ အရန်ဆန်သွင်းရတယ်။ အရင်တုန်းက ၁ဝရာခိုင်နှုန်း၊ အခု ၅ရာခိုင်နှုန်း။ အခုတော့သွင်းစရာ မလိုတော့ဘူး။ မသွင်းဘဲနဲ့ ပါမစ်ထုတ်ပေးမယ်တဲ့။ ဒါပိုပြီးအဆင်ပြေသွားတာပေါ့- အရန်ဆန်မသွင်းရဘူးဆိုတော့။ အရင်တုန်းက ၅ရာခိုင်နှုန်း အရှုံးခံပြီးသွင်းပေးနေရတာ နိုင်ငံတော်ကို။”
စီးပွားရေးနဲ့ ကူးသန်းရောင်းဝယ်ရေး ဝန်ကြီးဌာနက နိုင်ငံအရေးပေါ် ရိက္ခာအတွက် ဧည့်မထဆန် တန်ချိန် ၅၀,၀၀၀ နဲ့ စားအုံးဆီတန်ချိန် ၁၂,၀၀၀ တို့ကို အရန်ဝယ်ယူခဲ့တာပါ။ အဲဒီအတွက် သမ္မတရဲ့အရေးပေါ် ရန်ပုံငွေကနေ ကျပ် ၃၈ ဘီလီယံ ထုတ်ယူသုံးစွဲခွင့်ရခဲ့ပါတယ်။
Crd : VOA

0 comments:

Post a Comment