Friday, July 17, 2020

တီကျစ်မြို့တွင် ဘီယာသောက်ရင်း လက်ပစ်ဗုံး ဆော့ကစားရာမှ ပေါက်ကွဲမှုဖြစ်ပွားပြီး ရဲ နှစ်ဦးသေဆုံးကာ အရပ်သား နှစ်ဦးဒဏ်ရာရရှိမှုဖြစ်စဉ်ဖြစ်ပွား

ရှမ်းပြည်နယ်တောင်ပိုင်း၊ ပင်လောင်းမြို့နယ်၊ တီကျစ်ကျေးရွာအုပ်စု၊ တီကျစ်မြောက်ပိုင်းမှာ ဇူလိုင်လ ၁၅ရက်၊ ညပိုင်းအချိန်က ဘီယာသောက်နေတဲ့ရဲတပ်သားတစ်ဦးက လက်ပစ်ဗုံးဆော့ကစားရာမှ ပေါက်ကွဲမှုဖြစ်ပွားပြီး နှစ်ဦးသေဆုံးကာ နှစ်ဦးဒဏ်ရာရရှိခဲ့ကြောင်း တီကျစ်ရဲကင်းစခန်းထံမှ သိရပါတယ်။
တီကျစ်မြောက်ပိုင်းရှိ “ဇော်” ဆံသဆိုင်မှာ ဆိုင်ပိုင်ရှင် မောင်ဇော်၊ အောင်ပန်းနယ်မြေရဲစခန်းမှ ရဲတပ်သား ကျော်ဇင်လတ်၊ ခွန်စိန်ထွဋ်၊ ဇော်ဝင်းတို့(၄)ဦးက ဆံသဆိုင်အတွင်း ဘီယာအတူသောက်နေစဉ် ရဲတပ်သား ခွန်စိန်ထွဋ်မှ သူလွယ်ထားတဲ့ ပြောက်ကျားလွယ်အိတ်အတွင်းမှ အမျိုးအစား(စိစစ်ဆဲ) လက်ပစ်ဗုံးကိုထုတ်ယူပြီး ဆော့ကစားရာမှ ပေါက်ကွဲမှုဖြစ်ပွားခဲ့ကြောင်း သိရပါတယ်။
အဲဒီလိုဆော့ကစားနေတဲ့အတွက် ကျော်ဇင်လတ်နဲ့ မောင်ဇော်တို့မှ လက်ပစ်ဗုံးကို ဆော့ကစားခြင်းမပြုလုပ်ဖို့ တားမြစ်ပြောဆိုခဲ့ပေမယ့် ခွန်စိန်ထွဋ်မှ လက်ပစ်ဗုံးကလစ်ကို ဆွဲဖြုတ်ခဲ့တဲ့အတွက် မောင်ဇော်၊ ဇော်ဝင်းနဲ့ ရဲတပ်သားကျော်ဇင်လတ်တို့ ဆံသဆိုင်အပြင်သို့ ထွက်ပြေးစဉ် ပေါက်ကွဲမှုဖြစ်ပွားခဲ့တယ်လို့ သိရပါတယ်။
အဆိုပါပေါက်ကွဲမှုကြောင့် ကျော်ဇင်လတ်နဲ့ ခွန်စိန်ထွဋ်တို့ ထိခိုက်ဒဏ်ရာတွေကြောင့် အခင်းဖြစ်နေရာမှာ သေဆုံးခဲ့ပြီး ဇော်ဝင်းမှာ ဝမ်းဗိုက်ဝဲဘက်ယမ်းစထိမှန်ဒဏ်ရာ၊ ဝဲဘက်လက်ဖခုံး ယမ်းစဖောက်ဝင်ဒဏ်ရာ(မစိုးရိမ်ရ)တို့ ရရှိခဲ့ကြောင်း သိရပါတယ်။
အဲဒီဖြစ်စဉ်နဲ့ပါတ်သက်ပြီး လက်ပစ်ဗုံးအား မိမိနဲ့ အခြားသူတွေကို သေဆုံးဒဏ်ရာရရှိအောင် ပေါ့ဆစွာ ကိုင်တွယ်အသုံးပြုသူ ရဲတပ်သားခွန်စိန်ထွဋ်ကို ပင်လောင်းမြို့မရဲစခန်းမှာ ဥပဒေအရအရေးယူဖို့အတွက် ဆောင်ရွက်လျက်ရှိတယ်လို့လည်း သိရပါတယ်။
သတင်း-ဇွဲလေး(ရွှေတြိဂံ)

0 comments:

Post a Comment