Tuesday, May 12, 2020

ဩစတြေးလျနိုင်ငံရောက် မြန်မာနိုင်ငံသို့ ပြန်လိုသည့် မြန်မာနိုင်ငံသားများအတွက် အသိပေးကြေညာချက်

Image may contain: tree, sky and outdoor
၁။​​မြန်မာသံရုံး၊ ကင်ဘာရာမြို့အနေဖြင့် ဩစတြေးလျနိုင်ငံရောက် မြန်မာနိုင်ငံ သားများအနက်မှ မြန်မာနိုင်ငံသို့ဆောလျင်စွာပြန်လိုသူများအတွက် မြန်မာနိုင်ငံသို့ဝင်ရောက် နိုင်သည့် လေကြောင်းခရီးစဉ်/ ဖြတ်သန်းဝင်ရောက်နိုင်မည့်လမ်းကြောင်း အစရှိသည်ဖြင့် ဖြစ်နိုင်ချေမှန်သမျှကို စုံစမ်းမေးမြန်း ညှိနှိုင်းဆောင်ရွက်ပေးလျက်ရှိပါသည်။ ယင်းသို့ ဆောင်ရွက်ထားရှိမှုများကိုသိသာနိုင်ပါရန် အောက်ဖော်ပြပါအတိုင်းအကျဉ်းချုပ်ဖော်ပြလျက် အသိပေးအကြောင်းကြားအပ်ပါသည်
၂။​​လေကြောင်းလိုင်း၊ နိုင်ငံများအသီးသီး အဝင် အထွက်ကန့်သတ်ခဲ့သည့် အချိန် မှကပင်စတင်၍ မြန်မာသံရုံးအနေဖြင့် Myanmar Airways International (MAI) သို့ တိုက်ရိုက်ဆက်သွယ်ကာ ဩစတြေးလျနိုင်ငံသို့ Relief Flight စီစဉ်လိုပါက ဖြစ်နိုင်ချေ ရှိ-မရှိ ကိုစုံစမ်းခဲ့ပါသည်။ သို့ရာတွင် အထွေထွေကုန်ကျစရိတ်များမှာ ခရီးသည်များပေါ်တွင် များစွာ ကြီးလေးနိုင်ကြောင်းသိရှိရသဖြင့် လက်တွေ့အကောင်အထည်မဖော်နိုင်ခဲ့ပါ။

၃။​​တဖန် စင်ကာပူနိုင်ငံလေကြောင်းလိုင်းသည် ရက်သတ္တပတ် တစ်ပတ်လျင် (၃)ကြိမ်၊ ဆစ်ဒနီမှ စင်ကာပူသို့ပျံသန်းနေကြောင်း သိရှိရသဖြင့် မူလကသတ်မှတ်ထားရှိ ခဲ့သည့် စင်ကာပူသို့သွားရောက်နိုင်ရေးဖြစ်နိုင်ချေများကို ကင်ဘာရာအခြေစိုက် စင်ကာပူ နိုင်ငံသံအမတ်ကြီးနှင့် အလွတ်သဘောစုံစမ်းမေးမြန်းခဲ့ပါသည်။ ၎င်းကလည်း ချက်ချင်း ဆိုသလို သက်ဆိုင်ရာစင်ကာပူအစိုးရနှင့် စင်ကာပူလေကြောင်းလိုင်းများသို့ ဆက်သွယ်ပြီး အောက်ပါအတိုင်း ပြန်ကြားလာပါသည်-

​​(က)​ဆစ်ဒနီမှ စင်ကာပူသို့ ရက်သတ္တပတ် တစ်ပတ်လျင် (၃)ကြိမ် ပျံသန်း ​​​နေသည်မှာ မှန်ကန်ပါကြောင်း၊

​​​(ခ)​သို့ရာတွင် အဆိုပါလေယာဉ်များမှာ အဓိကအားဖြင့် ကုန်တင်နေသည့် ​​​လေယာဉ်ဖြစ်ပါကြောင်း၊ သို့ရာတွင် စင်ကာပူနိုင်ငံသားနှင့် စင်ကာပူ ​​​တွင် အမြဲနေထိုင်ခွင့်ရသူများကိုသာ တင်ဆောင်ပါကြောင်း၊

​​​(ဂ)​စင်ကာပူနိုင်ငံသို့ မည်သည့်ခရီးသည်၊ မည်သည့်လေကြောင်းလိုင်းကိုမြှ Transit ခှငျ့မပွုပါကွောငျး၊
(ဃ)သို့ရာတွင် အဆိုပါ ဆစ်ဒနီ-စင်ကာပူလေယာဉ်ခရီးစဉ်ကို စင်ကာပူ ရောက်ရှိသည့် အခါ ခရီးသည်နှင့် ကုန်ပစ္စည်းများကိုချပြီး စင်ကာပူ- ရန်ကုန်-စင်ကာပူ ထပ်တိုးခရီးစဉ်အဖြစ် ပျံသန်းပေးနိုင်ခြေ ရှိ/မရှိကို စုံစမ်းပေးမည်ဖြစ်ပါကြောင်း၊

​​​(င)​ယင်းသို့ ဆောင်ရွက်ပေးရန်အတွက် စင်ကာပူနိုင်ငံအစိုးရထံမှ ၎င်း ​​​(စင်ကာပူသံအမတ်ကြီး) က ခွင့်တောင်း/တီးခေါက် မေးမြန်းပေးမည် ​​​ဖြစ်ပါကြောင်း၊

(စ)​အကယ်၍ အထက်ပါအပိုဒ်ခွဲ (ဃ) ဆောင်ရွက်ခွင့်ရှိမည်ဆိုပါက စင်ကာပူနိုင်ငံလေကြောင်းနှင့် လေယာဉ်လက်မှတ်ကုန်ကျစရိတ်များ ကို တွက်ချက်အကြောင်းပြန်ကြားပေးမည်ဖြစ်ပါကြောင်း၊ လေယာဉ် စရိတ်မှာပုံမှန်ထက်ကြီးမြင့်နိုင်သည်ကို ကြိုတင်ခန့်မှန်းထားစေ လိုကြောင်း။

၄။​​ယင်းသို့ မြန်မာသံရုံးကစုံစမ်းမေးမြန်းထားသည့်အပေါ် စင်ကာပူလေကြောင်း လိုင်းအနေဖြင့် ခရီးသည်အရေအတွက်နှင့် အခြားသောအုပ်ချုပ်မှုဆိုင်ရာအခက်အခဲများ ကြောင့် အဆိုပါခရီးစဉ်ကိုပျံသန်းပေးနိုင်ခြင်းမရှိပါကြောင်း အကြောင်းပြန်ကြားလာခဲ့ ပါသည်။

၅။​​ထို့အပြင် ပြည်ပနိုင်ငံအသီးသီးတွင် အကြောင်းအမျိုးမျိုးဖြင့် ရောက်ရှိနေပြီး မြန်မာနိုင်ငံသို့ မဖြစ်မနေပြန်လည်ထွက်ခွာရမည့် မြန်မာနိုင်ငံသားများရှိပါက ၈-၅-၂၀၂၀ ရက်နေ့တွင် အင်ချွန်းအပြည်ပြည်ဆိုင်ရာလေဆိပ်မှ ရန်ကုန်မြို့သို့ ဒုတိယအကြိမ် Relief Flight အဖြစ်ထွက်ခွာမည့် မြန်မာအပြည်ပြည်ဆိုင်ရာလေကြောင်းလိုင်းတွင် လိုက်ပါမည် ဆိုပါကသတ်မှတ်ပုံစံတွင်ဖြည့်သွင်း၍ မြန်မာသံရုံး၊ ဆိုးလ်မြို့သို့ ဆောလျင်စွာပေးပို့ပေးရန် နှင့် မေလ (၁၅)၊ (၂၂)နှင့် (၂၉)ရက်နေ့များ၌ ထပ်မံထွက်ခွာမည့် Relief Flight များတွင် မြန်မာသံရုံးများမှပေးပို့မည့်လူစာရင်းများကို ဉီးစားပေးလိုက်ပါခွင့်ပြုနိုင်ရေး မြန်မာသံရုံး၊ ဆိုးလ်မြို့အနေဖြင့်စီစဉ်ထားရှိပါကြောင်း မြန်မာသံရုံး၊ ကင်ဘာရာမြို့၏ Facebook စာမျက်နှာတွင် ဖော်ပြအကြောင်းကြားခဲ့ပါသည်

၆။​​သို့ရာတွင် ဩစတြေးလျနိုင်ငံမှ ကိုရီးယားသမ္မတနိုင်ငံ၊ ဆိုးလ်မြို့သို့ Asiana Airlines လေကြောင်းလိုင်းတစ်ခုသာပျံသန်းလျက်ရှိပြီး မေလ (၈)၊ (၁၂)၊ (၂၃) နှင့် (၃၀) ရက် နေ့များတွင် လေကြောင်းခရီးစဉ်များရှိကြောင်း စုံစမ်းသိရှိရပြီး ဆစ်ဒနီမြို့မှ ဆိုးလ်မြို့သို့ ပျံသန်းသည့် အထက်ဖော်ပြပါလေယာဉ်ခရီးစဉ်မြား ဆိုးလျမွို့သို့ရောကျရှိမည့်နေ့ရက်နှင့် အချိန်များအရ အင်ချွန်းအပြည်ပြည်ဆိုင်ရာလေဆိပ်မှ ရန်ကုန်မြို့သို့ထွက်ခွာမည့် လေကြောင်းခရီးစဉ်များနှင့် Layover အချိန်နဲသဖြင့် ချိတ်ဆက်နိုင်ခြင်းမရှိကြောင်း တွေ့ရှိရ ပါသည်။

၇။​​သို့ဖြစ်ပါ၍ ဆစ်ဒနီမြို့မှ ဆိုးလ်မြို့သို့ ပျံသန်းသည့်လေယာဉ်ခရီးစဉ်များအရ ဆိုးလ်မြို့သို့ရောက်ရှိမည့် မေလ (၉)၊ (၁၃)၊ (၂၄) နှင့် (၃၁) ရက်နေ့များအနက်မှ အဆင်ပြေ နိုင်မည့် ရက်တစ်ရက်ကိုသတ်မှတ်၍ အင်ချွန်း-ရန်ကုန် ခရီးစဉ်ပျံသန်းပေးနိုင်ရေးအပေါ် ညှိနှိုင်းစဉ်းစားပေးနိုင်ပါရန်မြန်မာသံရုံး၊ ကင်ဘာရာမြို့ကနိုင်ငံခြား‌ရေးဝန်ကြီးဌာနမှတစ်ဆင့် သက်ဆိုင်ရာ ဝန်ကြီးဌာနများနှင့် ညှိနှိုင်းဆောက်ရွက်ထားရှိခဲ့ပြီး ပြန်ကြားချက်ကို စောင့်ဆိုင်း လျက်ရှိပါသည်။

၈။​​ထို့အပြင် မြန်မာနိုင်ငံတွင်ရောက်ရှိနေကြသည့် ဩစတြေးလျနိုင်ငံသားများ နှင့်အမြဲတမ်းနေထိုင်ခွင့်ရှိသူများအတွက် ရန်ကုန်မြို့မှ ဆစ်ဒနီမြို့သို့ ပြေးဆွဲပျံသန်းမည့် ကယ်ဆယ်‌ရေးလေယာဉ် (Relief Flight)သည် ၁၀-၅-၂၀၂၀ရက်နေ့တွင် ရန်ကုန်မြို့မှ ထွက်ခွာရန်ရှိကြောင်း၊ အဆိုပါ ရန်ကုန်-ဆစ်ဒနီ ခရီးစဉ်အတွင်း အရှေ့တောင်အာရှနိုင်ငံ တစ်နိုင်ငံတွင် ကြားဝင်ရပ်နားမည်ဖြစ်ကြောင်း ရန်ကုန်မြို့ရှိ ဩစတြေးလျသံရုံး၏ Website နှင့် Facebook စာမျက်နှာတို့တွင် ၆-၅-၂၀၂၀ ရက်နေ့က အကြောင်းကြားဖော်ပြထားသည် ကို မြန်မာသံရုံး၊ ကင်ဘာရာမြို့က သိရှိခဲ့ရပါသည်။

၉။​​ယင်းသို့သိရှိလျင် သိရှိရခြင်း မြန်မာသံရုံး၊ သံအမတ်ကြီးက ဩစတြေးလျနိုင်ငံ၊ နိုင်ငံခြားရေးနှင့်ကုန်သွယ်ရေးဝန်ကြီးဌာန၊ သံတမန်ဌာနအကြီးအကဲဖြစ်သူ Ms. Kate Logan ထံသို့ စကားပြောကြေးနန်းဖြင့်ဆက်သွယ်၍ ဖော်ပြပါကယ်ဆယ်ရေးလေယာဉ် (Relief Flight)နှင့်အတူ ဩစတြေးလျနိုင်ငံရောက်မြန်မာနိုင်ငံသားများ ရန်ကုန်မြို့သို့လိုက်ပါနိုင်ခြင်း ရှိ-မရှိ မေးမြန်းစုံစမ်းခဲ့ပါသည်။

၁၀။​​ယင်းသို့စာပေးပို့ခဲ့သည့်ကိစ္စနှင့်စပ်လျဉ်း၍ ၁၀-၅-၂၀၂၀ ရက်နေ့တွင် ရန်ကုန် မြို့မှ ဆစ်ဒနီမြို့သို့ထွက်ခွာရန် စီစဉ်ထားသည့် လေကြောင်းခရီးစဉ်ကို စင်ကာပူအစိုးရက စီစဉ်ဆောင်ရွက်ခြင်းဖြစ်ပါကြောင်း၊ ဩစတြေးလျနိုင်ငံသားများအနေဖြင့် ၎င်းတို့ခရီးဆုံးဖြစ် သည့် ဩစတြေးလျနိုင်ငံသို့ ထွက်ခွာနိုင်ရန်အတွက် စင်ကာပူနိုင်ငံသို့ ဉီးစွာပို့ဆောင်ပေးမည် ဖြစ်ကြောင်း၊ ဩစတြေးလျနိုင်ငံမှ မြန်မာနိုင်ငံသို့ တိုက်ရိုက်ပျံသန်းသည့် လေကြောင်းခရီးစဉ် ရှိမည်မဟုတ်ပါကြောင်း၊ ဩစတြေးလျနိုင်ငံ၊ နိုင်ငံခြားရေးနှင့်ကုန်သွယ်ရေးဝန်ကြီးဌာနက အကြောင်းပြန်ကြားလာပါသည်။

၁၁။​​ထို့အပြင် ဩစတြေးလျနိုင်ငံရောက် မြန်မာနိုင်ငံသားများအနက်မှ မြန်မာနိုင်ငံ သို့ဆောလျင်စွာပြန်လိုသူအချို့၏ အကြံပြုသတင်းမျှဝေမှုအချို့ကိုလည်း မြန်မာသံရုံး၊ ကင်ဘာရာမြို့က သက်ဆိုင်ရာနိုင်ငံသံရုံး၊ လေကြောင်းလိုင်းများနှင့် ဆက်သွယ်ညှိနှိုင်း ဆောင်ရွက်ပေးခဲ့ပါသည်။

၁၂။​​သာဓကတစ်ခုအနေဖြင့် ထိုင်းနိုင်ငံရှိ ဩစတြေးလျနိုင်ငံသားများကို ဆစ်ဒနီ မြို့သို့ပို့ဆောင်ရန်အတွက် Thai Airways International က လေကြောင်းခရီးစဉ်များ စီစဉ် ပျံသန်းလျက်ရှိပါကြောင်း၊ ဩစတြေးလျနိုင်ငံမှ ဗန်ကောက်မြို့သို့ ပြန်လည်ထွက်ခွာသည့်လေကြောင်း ခရီးစဉ်များတွင် မြန်မာနိုင်ငံသားများလိုက်ပါခွင့်ရရှိရေးအတွက် သက်ဆိုင်ရာ နိုင်ငံ၊ လေကြောင်းလိုင်းနှင့် ညှိနှိုင်းဆောင်ရွက်ပေးပါရန် အကြံပြုသတင်းပေးပို့ခဲ့ပါသည်။

၁၃။​​ယင်းသို့သတင်းမျှဝေလာသည့်ကိစ္စနှင့်စပ်လျဉ်း၍ မြန်မာသံရုံး၊ ကင်ဘာရာမြို့ က ကင်ဘာရာမြို့ရှိ ထိုင်းနိုင်ငံသံရုံးသို့ ဆက်သွယ်မေးမြန်းခဲ့ပါသည်။ ယင်းသို့စုံစမ်းမေးမြန်း ခဲ့သည့်အပေါ် ဩစတြေးလျနိုင်ငံမှ ဗန်ကောက်မြို့သို့ ထွက်ခွာသည့် လေကြောင်းခရီးစဉ်တွင် ခရီးသည် (၂၄၀) ဉီးလိုက်ပါနိုင်ပါကြောင်း၊ သို့ရာတွင် ထိုင်းနိုင်ငံသို့ ပြန်လိုကြောင်း သံရုံးတွင် စာရင်းပေးထားသည့် ဩစတြေးလျနိုင်ငံရောက် ထိုင်းလူမျိုး ၁၀၀၀ ကျော်ရှိပါကြောင်း၊ အဆိုပါခရီးလေကြောင်းခရီးစဉ်မှာ ထိုင်းလူမျိုးများအတွက်သာ ရည်ရွယ်ပျံသန်းခြင်းဖြစ်၍ အခြားနိုင်ငံသားများ လိုက်ပါနိုင်ခြင်းမရှိပါကြောင်း၊ မြန်မာသံရုံးနည်းတူ ဩစတြေးလျနိုင်ငံ ကင်ဘာရာမြို့ရှိ လာအိုသံရုံးကလည်း ယင်းတို့နိုင်ငံသားများ အဆိုပါလေယာဉ်ခရီးစဉ်ဖြင့် လိုက်ပါနိုင်ခြင်း ရှိ-မရှိ စုံစမ်းမေးမြန်းလာခဲ့ပါကြောင်း၊ လောလောဆယ်တွင် ထိုင်းလူမျိုးများ သာ လိုက်ပါခွင့်ရှိမည်ဖြစ်ပါကြောင်း အကြောင်းပြန်ကြားခဲ့ပါသည်။

၁၄။​​အလားတူ ဂျပန်နိုင်ငံရောက် မြန်မာနိုင်ငံသားများကို All Nippon Airways (ANA) မှ ကယ်ဆယ်ရေးလေယာဉ် (Relief Flight) များဖြင့် တိုကျိုမြို့မှ ရန်ကုန်မြို့သို့ ပျံသန်းလျက်ရှိသည်ကိုသိရှိရသဖြင့် ဩစတြေးလျနိုင်ငံရောက်မြန်မာနိုင်ငံသားများအနေဖြင့် ANA လေကြောင်းလိုင်းဖြင့် ဩစတြေးလျနိုင်ငံမှ တိုကျိုမြို့သို့ဉီးစွာသွားရောက်ပြီး တိုကျိုမြို့ မှ ရန်ကုန်မြို့သို့ပျံသန်းသည့် ကယ်ဆယ်ရေးလေယာဉ်ဖြင့် လိုက်ပါနိုင်မည့် အခြေအနေကို လည်း စုံစမ်းဆောင်ရွက်ခဲ့ပါသည်။ လောလောဆယ်တွင် ဂျပန်နိုင်ငံအနေဖြင့် ယင်း၏ အပြည်ပြည်ဆိုင်ရာလေဆိပ်များတွင် ပြည်ပခရီးသည်များဖြတ်သန်းသွားလာမှု (Transit) ပြုလုပ်ခြင်းကို ပိတ်ပင်ထားခြင်းကြောင့်လည်းကြောင်း၊ ဆစ်ဒနီမြို့မှ တိုကျိုမြို့သို့ ပျံသန်း သည့်လေကြောင်းခရီးစဉ်သည် တိုကျိုမြို့ Haneda လေဆိပ်သို့ဆင်းသက်ပြီး ရန်ကုန်မြို့သို့ ပျံသန်းသည့် Relief Flight သည် Narita လေဆိပ်မှထွက်ခွာခြင်းဖြစ်သောကြောင့် လည်းကောင်း၊ ခရီးသည်ဝင်ထွက်သွားလာမှု ပိတ်ပင်ကန့်သတ်ထားသည့် အခြေအနေများ ကြောင့် တိုကျိုမြို့မှတစ်ဆင့် Relief Flight ဖြင့်လိုက်ပါရေးမှာလည်း အဆင်ပြေမှုမရှိ ပါကြောင်း ဖော်ပြအပ်ပါသည်။

၁၅။​​မြန်မာသံရုံး၊ ကင်ဘာရာမြို့အနေဖြင့် ဩစတြေးလျနိုင်ငံရောက် မြန်မာနိုင်ငံ သားများအနက်မှ မိခင်နိုင်ငံသို့ဆောလျင်စွာပြန်လိုသူများအတွက် နည်းလမ်းပေါင်းစုံဖြင့် စုံစမ်း ညှိနှိုင်း ပူးပေါင်းဆောင်ရွက်ပေးလျက်ရှိသော်လည်း ယခုအချိန်အထိ အဆင်ပြေမည့် လေယာဉ်ခရီးစဉ်/ ဖြတ်သန်းဝင်ရောက်နိုင်သည့်လမ်းကြောင်း မရှိသေးပါကြောင်း အသိပေး ဖော်ပြအပ်ပါသည်။

၁၆။​​မြန်မာသံရုံး၊ ကင်ဘာရာမြို့အနေဖြင့် မိမိတို့နိုင်ငံသို့ ဆောလျင်စွာပြန်လိုသည့် မြန်မာနိုင်ငံသားများအတွက် မိမိတို့လက်လှမ်းမီသ၍ ဖြစ်နိုင်သည့် နည်းလမ်းပေါင်းစုံကို ရှာဖွေ စုံစမ်း ညှိနှိုင်း ဆောင်ရွက်လျက်ရှိသည့်နည်းတူ ဩစတြေးလျနိုင်ငံရောက် မြန်မာ နိုင်ငံသားများထံမှလည်း အကြံပြုချက် သတင်းမျှဝေမှုတို့ကို ကြိုဆိုလျက်ရှိပါကြောင်းနှင့် ရရှိ သည့်အကြံပြုချက်၊ သတင်းအချက်အလက်များကိုလည်း သက်ဆိုင်ရာတို့နှင့် ညှိနှိုင်းဆောင် ရွက်ပေးသွားမည်ဖြစ်ပါကြောင်းကို ဖော်ပြအပ်ပါသည်။

၁၇။​​သို့ဖြစ်ပါ၍ ဩစတြေးလျနိုင်ငံတွင်ရောက်ရှိနေပြီး မြန်မာနိုင်ငံသို့ဆောလျင်စွာ ပြန်လိုကြသည့် မြန်မာနိုင်ငံသားများအတွက် မြန်မာသံရုံး၊ ကင်ဘာရာမြို့က စဉ်ဆက်မပြတ် ကြိုးပမ်းဆောင်ရွက်ပေးလျက်ရှိသည်များကို အသိပေးဖော်ပြလျက် ဖြစ်ပေါ်တိုးတက်မှုများ ကိုလည်း အချိန်နှင့်တစ်ပြေးညီ ဆက်လက်အသိပေးအကြောင်းကြားပေးသွားမည်ဖြစ် ကြောင်း ထပ်လောင်းဖော်ပြအပ်ပါသည်။

(မှတ်ချက်- ဩစတြေးလျနိုင်ငံရောက်မြန်မာနိုင်ငံသားများဟုဆိုရာတွင် ဩစတြေးလျနိုင်ငံ တစ်နိုင်ငံတည်းရှိ မြန်မာနိုင်ငံသားများသာမက နယူးဇီလန်၊ ပါပူဝါနယူးဂီနီ၊ ဖီဂျီ အစရှိသည့် နိုင်ငံများရှိမြန်မာနိုင်ငံသားကိုပါ ဆိုလိုခြင်းဖြစ်ပါကြောင်းဖော်ပြအပ်ပါသည်)

Source : Myanmar Embassy Canberra #Myanmar_Online_News

0 comments:

Post a Comment