Thursday, September 5, 2019

ပင်လယ်ရေမျက်နှာပြင်မြင့်တက်မှုကြောင့် နိုင်ငံတကာ၏အကူအညီလိုအပ်နေသည့် ကမ်းရိုးတန်းဒေသများ

Image may contain: ocean, sky, outdoor, water and nature

ကမ္ဘာ့ရာသီဥတုပြောင်းလဲမှုနှင့်အတူ လိုက်ပါပြောင်းလဲလာသည်က ကမ္ဘာ့ပင်လယ်ရေမျက်နှာပြင် မြင့်တက်လာမှုဖြစ်သည်။ ပင်လယ်ရေမျက်နှာပြင် မြင့်တက်မှုကြောင့် ကမ်းရိုးတန်းဒေသများကို ပိုင်ဆိုင် ထားသည့် နိုင်ငံများမှာ မကြာခဏ ရေလွှမ်းမိုးမှုခံနေရပြီး မြေမျက်နှာပြင်သည်လည်း တစ်နေ့တခြား ပင်လယ်ရေမျက်နှာပြင်အောက်သို့ ကျဆင်းလာသည်။

အဆိုပါအန္တရာယ်ကို အများဆုံး ရင်ဆိုင်နေရသည့်ဒေသမှာ အာရှ-ပစိဖိတ်ဒေသရှိ ကမ်းရိုးတန်းနိုင်ငံ များဖြစ်သည်။ ထို့ကြောင့် ယင်းနိုင်ငံများအနေဖြင့် လက်ရှိနေရာမှ ရွှေ့ပြောင်းမည်လား သို့တည်းမဟုတ် ကိုယ့်နေရာကို ပင်လယ်ရေအောက်မရောက်စေရန် လုပ်ဆောင်မည်လားဟူ၍ ခက်ခဲသော ရွေးချယ်မှုကို ပြုလုပ်လာရသည်။
အင်ဒိုနီးရှားအစိုးရကတော့ ၄င်း၏မြို့တော်ကို ပင်လယ်ရေမျက်နှာပြင်အောက်သို့ တစ်နေ့တခြား ရောက်ရှိလာသည့် ဂျကာတာမြို့မှ တခြားနေရာသို့ ပြောင်းရွှေ့ရန်စီစဉ်ထားသည်။ ဖီဂျီနိုင်ငံကလည်း ကမ်းရိုးတန်းဒေသရှိကျေးရွာများကို ကုန်းတွင်းပိုင်းဒေသများသို့ ရွှေ့ပြောင်းပေးမည်ဖြစ်သည်။ မာရှဲကျွန်းစုများနိုင်ငံက ကမ်းရိုးတန်းဒေသများ ရေလွှမ်းမိုးမှုမခံရစေရေးအတွက် ပင်လယ်တံတိုင်းများကို တည်ဆောက်နေသည်။
လူအများစုကမူ ၄င်းတို့၏ဒေသများကို စွန့်ခွာရန်အတွက် ငြင်းဆန်ထားသည်။ အဘယ်ကြောင့်ဆိုသော် ထိုနေရာများသည် ၄င်းတို့၏ဇာတိချက်မြှုပ်ဖြစ်သည့်အပြင် အိုးအိမ်အဆောက်အအုံများနှင့် အသက်မွေး ဝမ်းကျောင်းလုပ်ငန်းများရှိသည့် အတွက်ဖြစ်သည်။ ထိုသူများအတွက်ကတော့ သဘာဝဘေးဒဏ်မသင့်စေရန် တစ်နည်းတစ်ဖုံ လုပ်ဆောင်ပေးရမည်ဖြစ်သည်။
ထို့အတွက် အကူအညီများပေးရန်၊ ပင်လယ်ရေမျက်နှာ ပြင်မြင့်တက်လာမှုကို ကာကွယ်ရန်နှင့် ဆိုးဝါးသော ရာသီဥတု ဖြစ်ပေါ်လာမှုကိုကာကွယ်ရန်တို့အတွက် ငွေကြေးထောက်ပံ့မှုအများအပြားပေးရန် လိုအပ်ကြောင်း ရာသီဥတုဆိုင်ရာကျွမ်းကျင် ပညာရှင်များက စက်တင်ဘာ ၅ ရက် တွင်ပြောသည်။ ကမ္ဘာပေါ်တွင် နှစ်စဉ်နှင့် အမျှဖြစ်ပွားသည့် ရေကြီးမှု၊ မုန်တိုင်းတိုက်မှု၊ မြေပြိုမှုနှင့် ဆိုးဝါးသောဆောင်းရာသီအခြေ အနေများကြောင့် လူပေါင်းသန်း ၂၀ ကျော်မှာ သေကျေပျက်စီးကာ အိုးမဲ့အိမ်မဲ့ဖြစ်နေရသည်ဟု နိုင်ငံတကာ ကြက်ခြေနီအဖွဲ့နှင့် လခြမ်းနီအဖွဲ့တို့ကပြောထားသည်။
ပင်လယ်ရေမျက်နှာပြင်မြင့်တက်မှုနှင့် ကမ်းပါးများပြိုကျမှုကြောင့် ၂၀၅၀ ပြည့်နှစ်အရောက်တွင် ကျွန်းအများစု၌ လူများ နေထိုင်နိုင်တော့မည်မဟုတ်ပေ။ လူပေါင်း ၇၅၀ဝ၀ ရှိသည့် မာရှဲကျွန်းစုများနိုင်ငံ အတွက်မူ ကုန်းမြင့်ဒေသများသို့ရွှေ့ပြောင်းခြင်းက အဖြေတစ်ရပ်ဖြစ်မလာသည့်အတွက် ၄င်းတို့ နေထိုင်သည့်နေရာများ ပင်လယ်ရေမျက်နှာပြင်အောက်မကျရောက်စေရေး လုပ်ဆောင်နေရခြင်းဖြစ်သည်။
ဆင်းရဲသော သမုဒ္ဒရာတွင်းနိုင်ငံများသာမက ချမ်းသာသောမြို့ပြနိုင်ငံဖြစ်သည့် စင်ကာပူနိုင်ငံသည်လည်း အလားတူ ခြိမ်းခြောက်မှုနှင့်ရင်ဆိုင်နေရသည်။ သို့သော် လာမည့်ဆယ်စုနှစ်များစွာအတွင်း စင်ကာပူနိုင်ငံကို ပင်လယ်ရေမျက်နှာပြင်အောက် မရောက်ရှိစေရေးအတွက် စင်ကာပူ ဒေါ်လာ ဘီလီယံ ၁၀ဝ နှင့်အထက်သုံးစွဲ သွားမည်ဖြစ်ကြောင်း ဝန်ကြီးချုပ် လီရှန်လွန်းက ကတိပြုထားသည်။
ထို့အတွက် ဆိုးဝါးသောရာသီဥတု ပြောင်းလဲမှု၏နောက်ဆက်တွဲ အကျိုးဆက်ဖြစ်သော ပင်လယ်ရေမျက်နှာပြင် မြင့်တက်မှုကြောင့် ကမ်းရိုးတန်းဒေသများ ရေလွှမ်းမိုးမှုမခံရစေရေး သက်ဆိုင်ရာနိုင်ငံများအပြင် နိုင်ငံတကာ အသိုင်းအဝိုင်းကပါ ကူညီဆောင်ရွက်ပေးရမည်ဖြစ်သည်။

0 comments:

Post a Comment