Thursday, August 8, 2019

ကရင္ျပည္နယ္တြင္ စာသင္ေက်ာင္း ၁၀၅ ေက်ာင္း ယာယီပိတ္ထားရ

ကရင်ပြည်နယ်အတွင်း မိုးသည်းထန်စွာရွာသွန်းပြီး မြစ်ရေနဲ့ တောင်ကျချောင်း ရေလျှံမှုတွေကြောင့် သြဂုတ် ၈ ရက် ညနေပိုင်းအထိ စာသင်ကျောင်းပေါင်း ၁၀၅ ကျောင် းယာယီပိတ်ထားရပါတယ်။

သြဂုတ်လဆန်းပိုင်းက စတင်ပြီး မိုးသည်းထန်စွာ ရွာသွန်းမှုနဲ့ သံလွင်မြစ်၊ ဟောင်သရောမြစ်၊ သောင်ရင်းမြစ်၊ လှိုင်းဘွဲချောင်း ရေလျှံမှုတွေ ဖြစ်ပေါ်ခဲ့တဲ့အတွက် စာသင်ကျောင်းတွေ ရေနစ်မြုပ်ခဲ့သလို ရေဘေးကယ်ဆယ်ရေး စခန်းတွေ ဖွင့်လှစ်ထားရတာတွေကြောင့် ယာယီပိတ်ထားရပြီး ကျောင်းသားကျောင်းသူ ၂၇၀၀၀ လောက် ပညာသင်ကြားတာ ရပ်နားထားရပါတယ်။
ဘားအံမြို့၊ အမှတ် ၂ ရပ်ကွက် (မြေနုကိုင်း) နေ မတင်မာဝင်းက “ဆရာမတွေက ကလေးတွေကို စာရင်းကောက်ထားတယ်။ လူဦးရေ ဘယ်လောက်ရှိလဲ။ ဒီမှာရှိတဲ့ ကလေးတွေကို စာသင်ပေးမယ်” လို့ ပြောပါတယ်။
ကရင်ပြည်နယ်ပညာရေးမှူးရုံး၊ ဒုတိယညွှန်ကြားရေးမှူး (စီမံ) ဦးငွေစိုးက “ရေကျသွားလို့ ပုံမှန်ကျောင်းပြန်ဖွင့်တဲ့ အခါကျရင်တော့ သူတို့အချိန်တွေကို ကုစားပြီးတော့ တနေ့ကို တချိန်နဲ့ ပျက်ခဲ့တဲ့ စာသင်ချိန်ကို ပြန်လည်ဖြည့်စွက်သင်ကြားပေးမယ့် အစီအစဉ်ရှိတယ်” လို့ ပြောပါတယ်။
ဘားအံမြို့၊ အမှတ် ၁ ရပ်ကွက် (မီးစက်အနောက်) နေ ဒေါ်နီလာက “အထောက်အပံ့နဲ့ လာသင်ပေးရင်တော့ ကောင်းတာပေါ့။ မနှစ်ကတော့ ခေါ်သင်ပေးတယ်။ ဒီနှစ်ကတော့ မနေ့ကမှ ရောက်တယ်ဆိုတော့ မသိသေးဘူး” လို့ ပြောပါတယ်။
မိုးသည်းထန်စွာရွာသွန်းမှု၊ မြစ်ရေနဲ့ တောင်ကျချောင်း ရေလျှံမှုတွေကြောင့် အခြေခံပညာ အထက်တန်းကျောင်း ၁၁ ကျောင်း၊ အလယ်တန်းကျောင်း ၃၇ ကျောင်း၊ မူလတန်းကျောင်း ၅၇ ကျောင်း ယာယီပိတ်ထားရပါတယ်။
လှိုင်းဘွဲမြို့နယ်မှာ သြဂုတ် ၇ ရက်နေ့က ညနေကျောင်းဆင်းချိန် မိုးသက်လေပြင်း တိုက်ခိုက်မှုကြောင့် ကျောင်းကြို စက်လှေတိမ်းမှောက်ပြီး ကျောင်းသူ ၂ ဦး ရေနစ်သေဆုံးခဲ့တယ်လို့ ဘေးအန္တရာယ်ဆိုင်ရာ စီမံခန့်ခွဲရေး ဦးစီးဌာန တာဝန်ရှိသူက ပြောပါတယ်။
သြဂုတ် ၉ ရက် ညနေ ၆ နာရီခွဲအချိန် တိုင်းတာချက်အရ သံလွင်မြစ်ရေဟာ ဘားအံမြို့ရဲ့ စိုးရိမ်ရေအမှတ် ၇၅၀ ကနေ ၈၁၇ စင်တီမီတာအထိ ကျော်လွန်ရောက်ရှိနေပြီး သောင်ရင်းမြစ်ရေကတော့ မြဝတီမြို့ရဲ့ စိုးရိမ်ရေမှတ် ၄၆၃ စင်တီမီတာအောက် ပြန်လည်ကျဆင်းနေပြီလို့ မိုးဇလက ထုတ်ပြန်ထားပါတယ်။
သတင်း၊ ဓာတ်ပုံ – ရဲမင်းခေါင်
DVB

0 comments:

Post a Comment