Tuesday, August 13, 2019

သင်တန်းတက်နေသည့် ဆရာဆရာမများထံ အလုပ်များသည့် နိုင်ငံတော်၏အတိုင်ပင်ခံပုဂ္ဂိုလ် အားပေးစကားသွားပြောသကဲ့သို့ ဒေသတွင်းပညာရေးတွင် တာဝန်ရှိသူများအနေဖြင့် အမြဲထိတွေ့၍ လိုအပ်သည်များ ဖြေရှင်းပေးသင့်ဟု လွှတ်တော်ကိုယ်စားလှယ် ဆွေးနွေး

သင်တန်းတက်နေသည့် ဆရာ၊ ဆရာမများထံ အလုပ်များသည့် နိုင်ငံတော်အတိုင်ပင်ခံ အားပေးစကားသွားပြောသကဲ့သို့ ဒေသတွင်းပညာရေးတွင် တာဝန်ရှိသူများအနေဖြင့် အမြဲထိတွေ့ကာ လိုအပ်သည်များကို ဖြေရှင်းပေးသင့်ဟု မန္တလေးတိုင်းဒေသကြီး မဲဆန္ဒနယ်အမှတ် (၁၀) မှ လွှတ်တော်ကိုယ်စားလှယ် ဦးကျော်မြင့်ဦးက ဆွေးနွေးခဲ့သည်။

သြဂုတ် ၁၃ ရက်က ပြုလုပ်သည့် ပြည်ထောင်စုလွှတ်တော်အစည်းအဝေးတွင် အမျိုးသားပညာရေးမူဝါဒကော်မရှင်၏ ခြောက်လတာကာလ (၂၀၁၈ ခုနှစ် အောက်တိုဘာ ၁၀ ရက်မှ ၂၀၁၉ ခုနှစ် ဧပြီ ၉ ရက်အထိ လုပ်ငန်းဆောင်ရွက်ခဲ့မှု အစီရင်ခံစာနှင့်ပတ်သက်ပြီး ဦးကျော်မြင့်ဦးက ဆွေးနွေးခဲ့သည်။
ပညာရေးစနစ်သစ်ကို ၂၀၁၆ ခုနှစ်မှ စကာပြောင်းလဲကျင့်သုံးခဲ့ကြောင်း၊ တာဝန်ရှိသူများ၊ တာဝန်ယူထားသူများအနေဖြင့် ပညာရေးအပြောင်းအလဲကို တိုင်းပြည်၏ အပြောင်းအလဲဟု သဘောထားကာ ဖော်ဆောင်သင့်ကြောင်း၊ ဒေသတွင်းတာဝန်ရှိသူ၊ တာဝန်ယူထားသူများအနေဖြင့် ဆရာ၊ ဆရာမများ၏ လိုအပ်ချက်များကို ထိတွေ့ဖြေရှင်းပေးသင့်ကြောင်း ဦးကျော်မြင့်ဦးက ဆွေးနွေးခဲ့သည်။
ဦးကျော်မြင့်ဦးက “ပညာရေးအပြောင်းအလဲကို တာဝန်ယူထားတဲ့နေရာမှာ ရှေ့တန်းတိုက်စစ်မှူးများဖြစ်တဲ့ အခြေခံဆရာ၊ ဆရာမများအား ရုပ်ဝတ္တု မပံ့ပိုးပေးနိုင်သေး ရင်တောင်မှ စိတ်ဓာတ်ခွန်အားများရရှိအောင် တာဝန်ရှိသူများမှ အမြဲထိစပ်ထိတွေ့နေသင့်ပါတယ်။ နိုင်ငံတော်၏အတိုင်ပင်ခံတောင်မှ အလုပ်များစွာကြားထဲက အိုကြီး အိုမနဲ့ နွေရာသီမှာ သင်တန်းပေးနေတဲ့၊ သင်တန်းတက်နေတဲ့ ဆရာ၊ဆရာမများထံ အားပေးစကားသွားရောက်ပြောကြားခဲ့သေးရင် ဒေသတွင်းပညာရေးမှာ တာဝန်ယူထားတဲ့ တာဝန်ရှိသူတွေဟာ ပညာရေးဝန်ထမ်းများ နှင့်အတူ အမြဲတမ်းထိတွေ့လျက် လိုအပ်တာများကို နိုင်တဲ့ဘက်မှ ဖြေရှင်းပေးနိုင်အောင် ကြိုးစားဖြေရှင်းပေးရမှာ ဖြစ်ပါတယ်” ဟု ဆွေးနွေးခဲ့သည်။
ပညာရေးအတွက် အသုံးစရိတ်များကို ၂၀၁၄ ခုနှစ်တွင် သုံးသည်ထက် ၂၀၁၉ ခုနှစ်တွင် အဆ ၅၀ ခန့် ပိုမိုသုံးစွဲလာသည်ကို တွေ့ရကြောင်း၊ တိုင်းပြည်ဖွံ့ဖြိုးမှု နောက်ကျကျန်ခဲ့သည်မှာ ပညာရေးစနစ်အားနည်းခဲ့၍ဖြစ်ကြောင်း၊ ပညာရေးအားနည်းခဲ့သည့်အတွက် အကျိုးအကြောင်း၊ အကောင်းအဆိုးကို ဝေဖန်ခွဲခြားနိုင်ခြင်းမရှိတော့ကြောင်း ၎င်းက ဆွေးနွေးခဲ့သည်။
“ပညာရေးအသုံးစရိတ်ကို ၂၀၁၄ ခုနှစ် ကထက် ၂၀၁၉ ခုနှစ်မှာ အဆ ၅၀ လောက် တိုးသုံးလာတာကိုတွေ့ရလို့ ဝမ်းသာမိပါတယ်။ ၂၀၁၆-၂၀၂၁ ပညာရေးမဟာဗျူဟာစီမံကိန်းကို စိန်ခေါ်မှုများစွာကြားထဲကနေ အကောင်အထည်ဖော်နေတာကို ကြိုဆိုပါတယ်။ စီမံကိန်းဟာ အခြေခံပညာကနေစလို့ အဆင့်မြင့်ပညာ၊ သက်မွေးပညာရပ်တွေကို သင်ရိုးသစ်နဲ့အတူ သင်ကြားနည်းပုံစံကိုပါ ပြောင်းလဲပြီး ကျွန်တော်တို့နိုင်ငံရဲ့ မျိုးဆက်တွေကို ဆန်းသစ်တီထွင်တတ်သူတွေ၊ တွေးခေါ်မြော်မြင်တတ်သူတွေ၊ သဘာဝပတ်ဝန်းကျင်ကို ထိန်းသိမ်းတတ်သူတွေ၊၊ စာနာစိတ်ရှိတဲ့သူတွေ၊ တာဝန်ယူမှု၊ တာဝန်ခံစိတ်ရှိတဲ့သူတွေ၊ ကိုယ့်နိုင်ငံကို ရေရှည်တည်တံ့အောင် စောင့်ထိန်းနိုင်မယ့် တကယ့်နိုင်ငံသားကောင်းတွေအဖြစ်  ဉာဏ်ပညာကြီးမားတဲ့ မျိုးဆက်သစ်တစ်ခုကို ပေါ်ထွန်းလာအောင် ကြိုးစားဆောင်ရွက်နေတာ ဖြစ်ပါတယ်။ ကျွန်တော်တို့တိုင်းပြည်နောက်ကို ကျန်ခဲ့တာဟာ ကိုယ်ကျင့်တရားနဲ့ ဉာဏ်ပညာနည်းပါးခဲ့လို့ပဲ ဖြစ်ပါတယ်။ တစ်လုံးတည်းပြောရရင်တော့ ပညာရေးအားနည်းခဲ့လို့ ဖြစ်ပါတယ်။ ပညာရေးအားနည်းခဲ့လို့ အကြောင်းအကျိုး အဆိုးအကောင်းကို ဝေဖန်ပိုင်းခြားမှု အားနည်းလာပါတယ်။ အမှားအမှန်ခွဲခြားတတ်တဲ့ အလေ့အကျင့်အားနည်းလာပါတယ်။ ကြောက်စိတ်ကြီးမားလာတယ်။ သင်ပေးတာကလွဲရင် ပြန်ပြီးတော့ ဖြန့်ကျက်မတွေးတတ်တော့ဘူး။ အဲဒီမှာ တီထွင်ကြံဆမှုတွေ မရှိတော့ပါဘူး။ ကိုယ်သိထားတာကို အမှန်လို့ပဲထင်ပြီးတော့ အစုအဖွဲ့နဲ့ မလုပ်ကိုင်တတ်တော့ပါဘူး။ အဲဒီတော့ ရန်ဖြစ်ရင်းနဲ့ပဲ ကျွန်တော်တို့ဟာ နှစ်တွေမနည်းတော့အောင်နောက်မှာ ကျန်ခဲ့ပါတယ်။ တိုင်းပြည်လည်း အင်မတန်မှ နစ်နာလှပြီဖြစ်ပါတယ်။ အခုတော့ ပညာရေးကို စတင်ပြောင်းလဲဖို့ ကျွန်တော်တို့အစိုးရသစ်လက်ထက်မှာ ကြိုးစားနေပြီဖြစ်ပါတယ်။ ၂၀၁၆ ခုနှစ်ကနေစပြီး ပညာရေးကို ပြောင်းလဲနေပြီဖြစ်ပါတယ်။ လိုအပ်ချက်တွေကတော့ ရှိနေဦးမှာဖြစ်ပါတယ်။ ပညာရေး ကဏ္ဍတိုးတက်အောင် မရရအောင်ပြောင်းကြရမှာ ဖြစ်ပါတယ်။ ဒါပေမဲ့ တာဝန်ရှိသူတွေ တာဝန်ယူထားသူတွေ၊ ပညာရေးအသိုင်းအဝိုင်းမှာ တာဝန်ယူထားသူတွေဟာ ဒီပညာရေးအပြောင်းအလဲကို တိုင်းပြည်ရဲ့ အပြောင်းအလဲခရာလို့ သဘောထားပြီး ဖော်ဆောင်သင့်ပါတယ်” ဟု  ဦးကျော်မြင့်ဦးက ဆွေးနွေးခဲ့သည်။
အမျိုးသားပညာရေးမူဝါဒကော်မရှင်၏ အစီရင်ခံစာနှင့်ပတ်သက်ပြီး အခြေခံပညာကျောင်းများဆီသို့ ကွင်းဆင်းသည့်အခါတွင် သုတေသနများ ပြုလုပ်သင့်ကြောင်း၊ ယခုပညာရေးစနစ်သစ်အား ကျောင်းသားမိဘများ နားလည်စေရန် ပိုမိုဆောင်ရွက်သင့်ကြောင်း၊ ကျေးရွာတိုင်းတွင် မူလတန်းကျောင်းများ ဖြစ်ပေါ်လာရန် ဆောင်ရွက်သင့်ကြောင်း ၎င်းက ဆက်လက်ဆွေးနွေးခဲ့သည်။
“အစီရင်ခံစာကို အကြံပြုလိုတာကတော့ အခြေခံပညာကျောင်းများဆီကို ဆင်းတဲ့အခါမှာ ဆင်းရုံတင်သာမကပဲနဲ့ တိုင်းနဲ့ ပြည်နယ်အားလုံးရဲ့ တိုင်းတစ်တိုင်းကိုဖြစ်စေ၊ ပြည်နယ်တစ်ခုကိုဖြစ်စေရွေး၍ တိုင်းလုံးကျွတ်၊ ပြည်လုံးကျွတ်ဆင်းပြီး သုတေသနများ လုပ်သင့်ပါတယ်။ တွေ့ရှိချက်များ၊ အကြံပြုချက်များကို အားမနာတမ်း အစီရင်ခံစာမှာ ဖော်ပြသင့်ပါတယ်။ လက်ရှိပညာရေး အပြောင်းအလဲကို မိဘ၊ ဆရာတော်တော်များများ နားမလည်သေးပါဘူး။ မိဘများ ပညာရေးကိုပူးပေါင်းလာစေရန် ပညာရေးစနစ်သစ်အကြောင်းကို မိဘများနားလည် စေရန်ဆွေးနွေးမှုတွေ အကြိမ်ကြိမ်ပြုလုပ်ပေးသင့်ပါတယ်။ ပြောင်းလဲနေတဲ့ ပညာရေး စနစ်သစ် KG + 12 ရဲ့ မူဝါဒများကို ပြတ်သားအောင် ဖော်ပြသင့်ပါတယ်။ အခြေခံပညာရေးဘတ်ဂျက်ကို ပြည်ထောင်စုဘတ်ဂျက်သာမက တိုင်းဒေသကြီး၊ ပြည်နယ်နဲ့ နေပြည်တော်ကောင်စီငွေလုံးငွေရင်း ရန်ပုံငွေများမှာလည်း အချိုးအစားတစ်ခုအထိ ထည့်သွင်းသုံးစွဲဖို့ ဒီအစီရင်ခံစာမှာ အကြံပြုသင့်ပါတယ်။ ကျေးရွာတိုင်းမှာ အနိမ့်ဆုံးအဖြစ် မူလတန်းကျောင်းတစ်ကျောင်းကို ဖော်ဆောင်သင့်ပါတယ်။ ဆရာအင်အား၊ ကျောင်းဆောင်အင်အား၊ သင်ထောက်ကူအင်အား လိုအပ်ချက်ကြောင့်မို့ ကျောင်းအဆင့်တိုးခြင်းများကိုလည်း ပြန်လည်သုံးသပ်သင့်ပါတယ်။ စတဲ့အချက်များကို အစီရင်ခံစာမှာ ထည့်သွင်းသင့်ပါတယ်။ အခက်အခဲများကြားမှ မိမိကျောင်းကို အောင်မြင်အောင်ကြိုးစားနေကြတဲ့ ဆရာ၊ ဆရာမများကိုလည်း ရာထူးအခွင့်အလမ်း ထူးချွန်ဆုများ၊ နိုင်ငံခြားပညာသင် အခွင့်အလမ်းများကို ဖန်တီးပေးခြင်းဖြင့် ဆုများချီးမြှင့်သင့်ပါတယ်” ဟု ဦးကျော်မြင့်ဦးက ဆွေးနွေးခဲ့သည်။

Eleven Media Group

0 comments:

Post a Comment