Tuesday, August 13, 2019

ပညာေရးစနစ္ ေျပာင္းလဲေရးတြင္ လူငယ္မ်ားပါဝင္ အႀကံျပဳရန္တိုက္တြန္း

ပညာရေးစနစ် ပြောင်းလဲရေးမှာ လူငယ်တွေ ပါဝင်ပြီး အကြံပြုကြဖို့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က မနေ့က နေပြည်တော်မှာလုပ်တဲ့ အပြည်ပြည်ဆိုင်ရာ လူငယ်များနေ့ အခမ်းအနားမှာ  တိုက်တွန်း ပြောပါတယ်။

“လူငယ်များ ပါဝင်ပြီး ပညာရေးစနစ်ကို ပြောင်းလဲမယ်ဆိုရင်၊ လူငယ်များက အချိန်ကို မှန်မှန်ကန်ကန်နဲ့ တန်ဖိုးအရှိဆုံးဖြစ်အောင်သုံးဖို့ ဘာတွေ လိုအပ်နေသလဲဆိုတာကို ကျမတို့ အစိုးရကို တင်ပြစေချင်ပါတယ်။ ဒါတွေကတော့ လူငယ်များရဲ့ အမြင်ပါ။ အမြင်ဆိုရာမှာလည်း အမြင်တခုရှိရုံနဲ့ မှန်သွားတယ်လို့ ဆုံးဖြတ်လို့မရပါဘူး။ အားလုံးက ဆွေးနွေးပြီး တယောက်နဲ့ တယောက် နှီးနှောဖလှယ်ပြီး အဖြေကိုရှာရမှာ ဖြစ်ပါတယ်”လို့ ဒေါ်အောင်ဆန်းစုကြည်က ပြောပါတယ်။
တကယ်ပြောင်းလဲချင်စိတ်ရှိရင် မြန်မြန်ဆန်ဆန် ပြောင်းလဲလို့ရပြီး မြန်မာတက္ကသိုလ်ရဲ့ တိုးတက်မှုနှုန်းဟာ ဒေသတွင်းမှာ နှေးနေတယ်လို့ သူက ဆိုပါတယ်။
“ကျမတို့တက္ကသိုလ်တွေရဲ့ ပညာရေးက ဘယ်အဆင့်ရှိလဲ ဆိုတာကို ကြည့်လိုက်တဲ့အခါမှာ ဒီ ၂ နှစ်ကျော် ၃ နှစ်အတွင်းမှာ တက်လာတယ်။ ကျမတို့ တိုးတက်တယ်ဆိုတာ မှန်တယ်၊ သို့သော်လည်း ကျမတို့ရဲ့ ဒေသအတွင်းက တခြားတက္ကသိုလ်တွေရဲ့ တိုးတက်မှုနှုန်းနဲ့စာရင် ကျမတို့ရဲ့ တိုးတက်မှုနှုန်းက နှေးတယ်။ ဘာကြောင့်နှေးတယ်ဆိုတာ အဓိက စဉ်းစားရမယ့်ကိစ္စပါ။ ဘယ်ဟာတွေမှာ အားနည်းချက်တွေရှိလဲ ဆိုတော့ ကျမတို့ဟာ သုသေသနလုပ်တဲ့ဘက်မှာလည်း အားနည်းနေတယ်။ ဘာသာစကားဘက်မှာလည်း အားနည်းနေတယ်။ Website တွေသုံးတဲ့ နေရာမှာလည်း ကျမတို့ရဲ့ တက္ကသိုလ်တွေက အားနည်းနေတယ်။ ဒီသုံးခုစလုံးက ဆက်နွှယ်နေပါတယ်” လို့ ပြောပါတယ်။
အစိုးရကျောင်းတွေကို အများကြီး တိုးတက်စေချင်တယ်လို့လည်း သူက ဆိုပါတယ်။
“ဘယ်အလွှာကပဲလာလာ ပညာရှာချင်တဲ့သူတွေ ပညာရှာလို့ရနိုင်တဲ့ ပညာရေးစနစ်တခုကို ကျမတို့ ထူထောင်နိုင်ဖို့ လိုအပ်ပါတယ်။ အခုဆိုရင် ပုဂ္ဂလိကကျောင်းတွေ ရှိတယ်၊ အစိုးရကျောင်းတွေရှိ တယ်။ ပွင့်ပွင့်လင်းလင်းပြောရရင် ကျမတို့ရဲ့ အစိုးရကျောင်းတွေကို အများကြီး တိုးတက်စေချင်တယ်။ ပိုက်ဆံရှိတဲ့ မိဘများဟာ သူတို့ရဲ့သားသမီးတွေကို ပုဂ္ဂလိကကျောင်းတွေကို လွှတ်တယ်ဆိုတဲ့ အစဉ်အလာကို ကျမ အားမပေးချင်ပါဘူး” လို့ ပြောပါတယ်။
လက်ရှိမှာတော့ နိုင်ငံဟာ ဖွံ့ဖြိုးတိုးတက်ရေးအတွက် ရုန်းကန်နေဆဲဖြစ်လို့ ပညာရေးစနစ် အတွက် သုံးချင်သလောက်၊ အကုန်အကျခံချင်သလောက် ခံနိုင်တဲ့ အနေအထားမှာ မရှိသေးဘဲ လူငယ်တွေက မိမိတို့ ပညာရရှိရေးအတွက် တာဝန်ယူရမှာ ဖြစ်ပြီး အစိုးရပိုင်းကလည်း အကောင်းဆုံး ပညာရေးစနစ်တခု ထူထောင်ဖို့အတွက်ကို တာဝန်ယူရမယ်လို့ သူက ဆိုပါတယ်။
ဓာတ်ပုံ- အတိုင်ပင်ခံရုံး
DVB

0 comments:

Post a Comment