Tuesday, August 6, 2019

လွိုင္းဘြဲ႕ၿမိဳ႕ ေရဘုတ္ေခ်ာင္း ေျမသားတမံ က်ိဳးေပါက္၍ မိုးစပါးခင္းမ်ား ေရနစ္ျမဳပ္

ကရင်ပြည်နယ်၊ လှိုင်းဘွဲ့မြို့နယ်၊ ထီလုံကျေးရွာမှာ မိုးသည်းထန်စွာ ရွာသွန်းမှုကြောင့် ရေဘုတ်ချောင်း ရေလျှံမှုကို ကာကွယ်ဖို့ တည်ဆောက်ထားတဲ့ မြေတမံ ကျိုးပေါက်ခဲ့တဲ့အတွက် စိုက်ပျိုးပြီး စပါးခင်း ဧက ၁၀၀ ခန့် ရေနစ်မြုပ်ခဲ့တယ်လို့ သြဂုတ် ၆ ရက်မှာ ဒေသခံတွေက ဒီဗွီဘီကို ပြောပါတယ်။

မိုးသည်းထန်စွာ ရွာသွန်းခဲ့တဲ့အတွက် မြေသားတမံ ကျိုးပေါက်ကာ စိုက်ပျိုးပြီး လယ်တွေနဲ့ နေအိမ်တွေဆီ ရေဝင်ရောက်မှုတွေ ဖြစ်ပေါ်ခဲ့ပြီး စိုက်ပျိုးပြီး စပါးခင်းတွေ ပျက်စီးဆုံးရှုံးမှာကို ဒေသခံတွေ စိုးရိမ်နေကြတာပါ။
လှိုင်းဘွဲ့မြို့နယ်၊ ထီလုံကျေးရွာ၊ ဦးချိုမှုက “ကြိုတင်ပြီးတော့ ကျနော်တို့ကို ပြင်ပေးပါ။ လယ်သမားတွေ ဆုံးရှုံးမှု ဖြစ်တယ်။ သူတို့က မိုးတမ နှစ်မ ရွာပြီးမှ တမံကို ပိတ်တယ်။ တမံက မြေကြီးပဲ ဆိုတော့ မခိုင်တော့ ပြန်ကျိုးသွားတယ်” လို့ ပြောပါတယ်။
လှိုင်းဘွဲ့မြို့နယ်၊ ထီလုံကျေးရွာ၊ ဦးစီနယ်ကာနုက “မနှစ်ကတော့ မစိုက်ဖြစ်တဲ့ လယ်တွေက ဒီအတိုင်း ထားလိုက်ရတယ်။ နောက်နည်းနည်းပါးပါး ရတဲ့နေရာတွေက ရတယ်။ မရတဲ့ နေရာတွေက မရဘူး” လို့ ပြောပါတယ်။
ဆည်မြောင်းနှင့် ရေအသုံးချမှု စီမံခန့်ခွဲရေးဦးစီးဌာန၊ တမံရေရှည်တည်တံရေး တာဝန်ခံ ဒုဦးစီးမှူး(မြို့ပြ)က “သူတို့က ဘယ်လိုမှ မြေကြီးမပေးဘူး။ ညှိလို့ မရတော့ သက်ဆိုင်ရာ အုပ်ချုပ်ရေးမှူးကို အကြောင်းကြားတယ်။ အုပ်ချုပ်ရေမှူးက မညှိပေးရင် ကျနော်တို့ ဆက်လုပ်လို့ မရဘူး။ မနေ့က တခေါက်လာတယ်။ ဒီအတိုင်းပဲ အဆင်မပြေဘူး”လို့ ပြောပါတယ်။
လှိုင်းဘွဲ့မြို့နယ်၊ ထီလုံကျေးရွာ၊ ဦးမလဲတလဲက “၂၀၃ တပ်ရင်းထဲမှာ ရေဖောက်လမ်း ရှိတယ်။ အဲဒီလမ်းကို ကျယ်အောင်ဖောက်ပေးရင် ဒီက ရေမနေဘူး။ စိုက်ပျိုးရေးသမားတွေရော လယ်သမားတွေရော မနည်းဘူး သက်သာမယ်”လို့ ပြောပါတယ်‌။
မိုးစပါး စိုက်ပျိုးကုန်ကျစရိတ် ၁ ဧက ၂ သိန်းကျော် ကုန်ကျပြီး ရေနစ်မြုပ်မှုကြောင့် ပျက်စီးဆုံးရှုံးမှုတွေ ဖြစ်ပေါ်လာရင် စိုက်ပျိုးရေးချေးငွေ ပြန်လည်ပေးဆပ်ဖို့နဲ့ မိသားစု စားဝတ်နေရေးအတွက် အခက်အခဲတွေ ရှိလာနိုင်တယ်လို့ ဒေသခံလယ်သမားတွေက ဆိုပါတယ်။
ရေဘုတ်ချောင်း မြေသားတမံကျိုးပေါက်မှုဟာ ၂၀၁၃ ခုနှစ်က ၁ ကြိမ်၊ ၂၀၁၈ ခုနှစ်က ၁ ကြိမ်ဖြစ်ပွားခဲ့ရာမှာ ဘားအံ-လှိုင်းဘွဲ့ ကားလမ်းမကြီး ရေကျော်မှုတွေ ဖြစ်ပေါ်ခဲ့တဲ့အတွက် ခရီးသွားလာမှု အခက်အခဲတွေ ဖြစ်ပေါ်ခဲ့ပြီး အခုအကြိမ် အပါအဝင် ၃ ကြိမ်မြောက် ထပ်မံကျိုးပေါက်ခဲ့တဲ့အတွက် ခိုင်ခံ့တဲ့ တမံအမျိုးအစားကို တည်ဆောက်ပေးဖို့ ဒေသခံတွေက တောင်းဆိုနေကြပါတယ်။
ကရင်ပြည်နယ်အတွင်း မိုးသည်းထန်စွာ ရွာသွန်းခဲ့တဲ့အတွက် သြဂုတ် ၆ ရက် မနက် ၉ နာရီခွဲအချိန် တိုင်းတာချက်အရ လှိုင်းဘွဲ့မြို့မှာ ၆ ဒသမ ၁၈ လက်မ ရွာသွန်းခဲ့ပြီး သြဂုတ် ၅ ရက်နေ့က ၅ ဒသမ ၁၉ လက်မစီ မိုးရွာသွန်းခဲ့ပါတယ်။
သတင်း – ရဲမင်းခေါင်
DVB

0 comments:

Post a Comment