Wednesday, August 7, 2019

ရေကြီး၍ တစ်နိုင်ငံလုံးတွင် စာသင်ကျောင်း ၈၀၀ ကျော် ယာယီပိတ်ထား

မိုးသည်းထန်စွာရွာသွန်း၍ ရေကြီးရေလျှံမှုများဖြစ်သောကြောင့် ဇူလိုင်လ ကုန်ပိုင်းမှစ၍ ဩဂုတ်လ ၂ရက်ထိ ကောက်ယူထားသောစာရင်းများအရ တစ်နိုင်ငံလုံးတွင် စာသင်ကျောင်းပေါင်း ၈၀၀ ကျော် ယာယီပိတ်ထားရကြောင်း အခြေခံပညာဦးစီးဌာနထံမှ သိရသည်။
ရေကြီး၍ မန္တလေးတိုင်းတွင် မူလတန်းကျောင်း ၁၅၃ ကျောင်း၊ အလယ်တန်းကျောင်း ၇၀ ၊ အထက်တန်းကျောင်း ၃၅ ကျောင်း စုစုပေါင်း ၂၅၈ ကျောင်း၊ စစ်ကိုင်းတိုင်းတွင် မူလတန်းကျောင်း ၄၃ ကျောင်း၊ အလယ်တန်းကျောင်း ၆၀၊ အထက်တန်းကျောင်း ၂၁ ကျောင်း စုစုပေါင်း ၁၂၄ ကျောင်း ပိတ်ထားရကြောင်း အဆိုပါစာရင်းအရ သိရှိရသည်။

ထို့ပြင် မကွေးတိုင်းတွင် မူလတန်းကျောင်း ၆၂ ကျောင်း၊ အလယ်တန်းကျောင်း ၃၇ ကျောင်း၊ အထက်တန်းကျောင်း ၁၀ ကျောင်း စုစုပေါင်း ၁၀၉ ကျောင်း၊ ရခိုင်ပြည် နယ်တွင် မူလတန်းကျောင်း ၈၂ ကျောင်း၊ အလယ်တန်းကျောင်း ၇၇ ကျောင်း၊ အထက် တန်းကျောင်း ၂၄ ကျောင်း စုစုပေါင်း ၁၈၃ ကျောင်း ပိတ်ထားရသည်။

ကချင်ပြည်နယ်တွင် မူလတန်းကျောင်း ၅၄ ကျောင်း၊ အလယ်တန်းကျောင်း ၃၆ ကျောင်း၊ အထက်တန်းကျောင်း ၁၅ ကျောင်း စုစုပေါင်း ၁၀၅ ကျောင်း ပိတ်ထားရပြီး တစ်နိုင်ငံလုံးတွင် ယင်းပြည်နယ်နှင့် တိုင်း ၅ ခုတို့သည် ရေကြီးမှုကြောင့် ကျောင်းအများဆုံးပိတ်ထားရကြောင်း အခြေခံပညာဦးစီးဌာန နေပြည်တော်ရုံးထံမှ သိရသည်။

အခြားပြည်နယ်နှင့် တိုင်းအချို့တွင် ရေကြီးသော်လည်း ကျောင်းများပိတ်ရခြင်းမရှိဘဲ ဧရာဝတီ၊ ပဲခူးနှင့် မွန်ပြည်နယ်တို့တွင်သာ ကျောင်းအနည်းငယ်ပိတ်ထားခြင်းများရှိပြီး တစ်နိုင်ငံလုံးအတိုင်းအတာဖြင့် စာသင်ကျောင်းပေါင်း ၈၁၇ ကျောင်း ပိတ်ထားရပြီး၊ ပြီးခဲ့သည့်ရက်ပိုင်းက ထပ်တိုးပိတ်ရသည့်ကျောင်းများ စာရင်းမရသေး၍ မပါဝင်သေးကြောင်း ယင်းဌာနထံမှ သိရှိရသည်။ 

အချို့နေရာများတွင်လည်း ရေပြန်ကျ၍ ပြန်ဖွင့်သည်များ ရှိသောကြောင့် စာရင်းတည်ငြိမ်မှုမရှိကြောင်း၊ ယခင်နှစ်များက ရေကြီးရေလျှံမှုကြောင့် ပြည်နယ်နှင့် တိုင်းအချို့တွင် အခြေခံပညာကျောင်းများ ၉၀၀ နီးပါး ယာယီပိတ်ထားပေးခဲ့ရကြောင်း အခြေခံပညာဦးစီးဌာနထံမှ သိရှိရသည်။

ကျော်ဖြိုး
The Voice

0 comments:

Post a Comment