Tuesday, August 6, 2019

နယူးဇီလန်တွင် ကိုယ်ဝန်ဖျက်ချမှုကို ရာဇဝတ်မှုအဖြစ်က ပယ်ဖျက်

နယူးဇီလန်အစိုးရသည် ကိုယ်ဝန်ဖျက်ချမှုကို ရာဇဝတ်မှုအဖြစ်မှပယ်ဖျက်ရန် အဆိုပြုထားပြီး အမျိုးသမီးများအား ကိုယ်ဝန်သီတင်းပတ် ၂၀ (ငါးလ) အထိ ဖျက်ချမှုကိုရွေးချယ်နိုင်ရန် ခွင့်ပြုတော့ မည်ဟု BBC သတင်းတွင် ဖော်ပြထားသည်။
၁၉၇၇ ခုနှစ်ကတည်းက သက်ရောက်ခဲ့သော ကိုယ်ဝန်ဖျက်ချခြင်းဆိုင်ရာ ဥပဒေကိုပြင်ဆင်မည့် ဥပဒေကြမ်း၏အသေးစိတ်အချက်များကို ဂျေဆင်ဒါအာဒန် အစိုးရက ထုတ်ပြန်ထားသည်။

လက်ရှိဥပဒေအရ ကိုယ်ဝန်ဆောင် မိခင်၏ စိတ်ပိုင်းနှင့်ရုပ်ပိုင်းဆိုင်ရာ ကျန်းမာရေးထိခိုက်နိုင်ကြောင်းကို ဆရာဝန်နှစ်ဦးက အတည်ပြုမှသာ ကိုယ်ဝန်ဖျက်ချခွင့်ရှိသည်။

ဥပဒေကြမ်းကို အမြန်ဆုံး မဲခွဲကြလိမ့်မည်ဟု မျှော်လင့်ကြောင်း ဝန်ကြီးချုပ် မစ္စအာဒန်က ပြောကြားသည်။ ဥပဒေကြမ်းကို ကြာသပတေးနေ့တွင် ပါလီမန်သို့ ပထမဆုံးအကြိမ် တင်သွင်းမည်ဖြစ်သည်။

ယင်းဥပဒေကို အတည်ပြုလိုက်ပါက ကိုယ်ဝန်ဆောင်မိခင်သည် ကိုယ်ဝန်ငါးလမပြည့်မီ ဖျက်ချခွင့်အတွက် ကျန်းမာရေးကျွမ်းကျင်သူ၏ အကဲဖြတ်မှုကို လိုအပ်တော့မည် မဟုတ်ပေ။ ကိုယ်ဝန်ဆောင်မိခင်သည် ကိုယ်ဝန်ဖျက်ချပေးသည့်ဌာနသို့ ကိုယ်တိုင်သွားရောက် ပြသနိုင်မည်ဖြစ်ပြီး ဆွေးနွေးလမ်းညွှန်မှုကို ရယူနိုင်မည်ဖြစ်သည်။

အကယ်၍ ကိုယ်ဝန် သီတင်းပတ် ၂၀ ကျော်ပါက ကိုယ်ဝန်ဖျက်ချပေးမည့်သူအနေနှင့် အမျိုးသမီး၏ စိတ်ပိုင်းနှင့် ရုပ်ပိုင်း ကျန်းမာရေးအခြေအနေသည် ဖျက်ချမှုလုပ်ဆောင်နိုင်ရန် လုံလောက်သည့် အနေအထားရှိကြောင်း ယုံကြည်မှုရှိရမည် ဖြစ်သည်။

ထို့ပြင် ကိုယ်ဝန်ဖျက်ချမှု ဆန့်ကျင်ဆန္ဒပြသူများ၏ နှောင့်ယှက်မှုများကို တားဆီးနိုင်ရန်အတွက် ကိုယ်ဝန်ဖျက်ချပေးသော ဆေးရုံ၊ ဆေးခန်းများ၏ ဥပစာတွင် ဘေးကင်းလုံခြုံမှု ဧရိယာ ထားရှိခြင်းကိုလည်း ဥပဒေက ခွင့်ပြုမည်ဖြစ်သည်။

“ပြောင်းလဲသင့်တဲ့အချိန်ပါပဲ။ ဘေးကင်းတဲ့ကိုယ်ဝန်ဖျက်ချမှုကို ကျန်းမာရေး ရှုထောင့်ကနေ ကိုင်တွယ်သင့်တာ ကြာပါပြီ။ အမျိုးသမီးတစ်ဦးဟာ သူ့ခန္ဓာကိုယ်မှာ ဖြစ်နေတဲ့ကိစ္စအတွက် ရွေးချယ်ပိုင်ခွင့် ရှိပါတယ်”ဟု တရားရေးဝန်ကြီး အင်ဒရူးလစ်တယ်က ပြောကြားသည်။

လက်ရှိဥပဒေတွင် ကိုယ်ဝန်ဖျက်ချရန် ခွင့်ပြုသည့် အများဆုံးကာလ သတ်မှတ်ချက်မရှိသော်လည်း ကိုယ်ဝန်ငါးလ နောက်ပိုင်းဖျက်ချမှုသည် မရှိသလောက်ပင်ဖြစ်သည်ဟုဆိုသည်။

ကိုယ်ဝန်ဖျက်ချပိုင်ခွင့်ဆိုင်ရာ အသင်းအဖွဲ့တစ်ခုဖြစ်သော Alranz ၏ ဥက္ကဋ္ဌ တယ်ရီဘယ်လာမတ်က သီတင်းပတ် ၂၀ ကန့်သတ်မှုကို ပိုမိုခွင့်ပြုသင့်သည်ဟု အကြံပြုသည်။

“သီတင်းပတ် ၂၀ အချိန်မှာ စကင်ဖတ် စစ်ဆေးမှုတွေရှိတယ်။ ဒီတော့ကိုယ်ဝန်ဆောင်တွေအနေနဲ့ စစ်ဆေးမှုရလဒ်တွေကို စဉ်းစားဖို့ အချိန်အနည်းငယ်ပဲ ရတာပေါ့”ဟု ၎င်းကဆိုသည်။

နယူးဇီလန်၏ လက်ရှိကိုယ်ဝန်ဖျက်မှုဥပဒေသည် ကိုယ်ဝန်ဆောင် အမျိုးသမီးတို့၏ လူ့အခွင့်အရေးကို ထိခိုက်စေသည်ဟု Alranz က ယခင်ကတည်းက စောဒက တက်ခဲ့သည်။

ကိုယ်ဝန်ဖျက်ချမှု ဆန့်ကျင်သော Voice for Life အဖွဲ့ကမူ မစ္စအာဒန် အစိုးရ၏အဆိုပြုချက်သည် အလွန်တရာ စိတ်ပျက်စရာကောင်းသည်ဟု ပြစ်တင်ရှုတ်ချလိုက်သည်။

၂၀၁၇ ခုနှစ်က အာဏာရလာသော မစ္စအာဒန်အစိုးရသည် သူမ၏ လေဘာပါတီနှင့် နယူးဇီလန်ဖတ်စ် အမျိုးသားရေးပါတီတို့ မဟာမိတ်ညွှန့်ပေါင်း ဖွဲ့စည်းထားခြင်းဖြစ်ပြီး ဂရင်းပါတီ၏ထောက်ခံမှုကိုပါ ရရှိထားသည်။

သို့ရာတွင် ယခု ကိုယ်ဝန်ဖျက်ချခြင်းဆိုင်ရာ ဥပဒေကြမ်းကို ပါလီမန်တွင် အမတ်များက ပါတီအသီးသီး၏မူနှင့်မဆိုင်ဘဲ ကိုယ့်ဆန္ဒအလျှောက် မဲပေးကြမည်ဖြစ်သည်။

The Voice

0 comments:

Post a Comment