Sunday, September 28, 2014

တယ်လီနော၊ အူရီဒူးနဲ့ MPT ဈေးကွက် ဘယ်လိုယှဉ်ပြိုင်ကြမလဲ


တယ်လီနော ဆင်းမ်ကတ်များကို ၀ယ်ယူရန် စောင့်ဆိုင်းနေသော မန္တလေးမြို့ ဒေသခံများအား တွေ့ရစဉ်

အူရီဒူးဆင်းမ်ကတ်များကို ဇူလိုင် ၃ဝ ရက်က ကနဦး စတင်ရောင်းချခဲ့ပြီး ဩဂုတ် ၁၅ ရက်တွင် ဝန်ဆောင်မှုများကို တရားဝင်စတင်လိုက်ကြောင်း ကြေညာခဲ့သည်။ ထို့နောက် စက်တင်ဘာ ၁ ရက်တွင် မြန်မာ့ဆက်သွယ်ရေးလုပ်ငန်းကလည်း ကျပ် ၁၅ဝဝ ဆင်းမ်ကတ်များကို ပြင်ပအရောင်းဆိုင်များတွင် စတင်ရောင်းချပေးခဲ့သည်။ တယ်လီနောကလည်း စက်တင်ဘာ ၂၇ ရက်တွင် မန္တလေး၌ ဆင်းမ်ကတ်များကို စတင်ရောင်းချပေးကာ ဝန်ဆောင်မှုများကို စတင်လိုက်ကြောင်း သိရသည်။အော်ပရေတာလေးခုအနက် အော်ပရေတာသုံးခုက ဝန်ဆောင်မှုများကို စတင်လိုက်ပြီးနောက် ယင်းကုမ္ပဏီသုံးခု အနေဖြင့် သုံးစွဲသူများကို မည်သို့စွဲဆောင်မည်၊ ဈေးကွက် မည်သို့ယှဉ်ပြိုင်ကြမည်ဆိုခြင်းမှာ စိတ်ဝင်တစား စောင့်ကြည့်ချင်စရာဖြစ်လာကြောင်း လေ့လာသူများက ဆိုသည်။

မြန်မာ့ဆက်သွယ်ရေးလုပ်ငန်း အနေဖြင့် အခြားအော်ပရေတာများထက် ခြေတစ်လှမ်း၊ နှာတစ်ဖျားမက သာခဲ့ပြီး ဆယ်စုနှစ်နှစ်ခုနီးပါး ဈေးကွက်ကို လွှမ်းမိုးချုပ်ကိုင်ထားခဲ့ကြောင်း သိရသည်။ တစ်ခုတည်းက လက်ဝါးကြီးအုပ် ချုပ်ကိုင်ထားသော အခြေအနေမျိုးတွင် ဝန်ဆောင်မှု အရည်အသွေး လျော့ကျခြင်းနှင့် ဈေးနှုန်းကြီးမြင့်ခြင်းကို သုံးစွဲသူများ ကြုံတွေ့ခဲ့ရပြီး အော်ပရေတာ ကုမ္ပဏီအသစ်များကို ကြိုဆိုခဲ့ကြသည်။

MPT မှာ ကွန်ရက်လွှမ်းခြုံထားနိုင်မှုအရ အော်ပရေတာအသစ်များထက် သာလွန်ခဲ့ပြီး ပြည်နယ်နှင့် တိုင်းဒေသကြီးအားလုံးတွင် အသုံးပြုနိုင်သောကြောင့် အော်ပရေတာအသစ်များ၏ ဆင်းမ်ကတ်များကို ဝယ်ယူသုံးစွဲသည့်တိုင်အောင် MPT ကတ်များကိုလည်း တွဲဖက်သုံးစွဲနေရသေးကြောင်း သိရသည်။

MPT မှာလည်း ပြိုင်ဘက်များရှိလာသောကြောင့် ဂျပန်နိုင်ငံအခြေစိုက် ကုမ္ပဏီတို့နှင့် ပူးပေါင်းခဲ့ပြီး ပြုပြင်ပြောင်းလဲမှုများ လုပ်ဆောင်ရန် ပြင်ဆင်ခဲ့ကြောင်း သိရသည်။

MPT နှင့် KDDI, Sumitomo ကုမ္ပဏီတို့ အကျိုးတူပူးပေါင်းသည့် စာချုပ်ကို ၂ဝ၁၄၊ ဇူလိုင်လတွင် သဘောတူလက်မှတ် ရေးထိုးခဲ့ပြီး အကျိုးတူပူးပေါင်းမှုကို စက်တင်ဘာ ၁ ရက်မှ စတင်ဆောင်ရွက်ခဲ့ကြောင်း သိရသည်။ လုပ်ငန်းအဆင့်တိုင်း၌ နှစ်ဖက်ကုမ္ပဏီတို့မှ တာဝန်ရှိ ဝန်ထမ်းတစ်ဦးစီ ပါဝင်သော ပူးတွဲဦးဆောင်ရေးအဖွဲ့ကို ဖွဲ့စည်းထားပြီး တစ်ခုတည်းသော အဖွဲ့အစည်းအဖြစ် စတင်ဆောင်ရွက်နေကြောင်း သိရသည်။

“ပြုပြင်ပြောင်းလဲမှုတွေ၊ ဖြေလျှော့မှုတွေ လုပ်သွားမှာဖြစ်ပေမယ့် အသုံးပြုသူပမာဏ ကြီးမားတာကြောင့် ကျွန်တော်တို့အနေနဲ့ အရမ်းလုပ်ဆောင်လို့ မရပါဘူး။ Evolution ပုံစံနဲ့ သွားရမှာဖြစ်ပြီး တဖြည်းဖြည်းချင်း ပြုပြင်ပြောင်းလဲသွားရမှာ ဖြစ်ပါတယ်” ဟု မြန်မာ့ဆက်သွယ်ရေးလုပ်ငန်းမှ ဦးစောထူးသာက ပြောကြားသည်။

ကျပ် ၁၅ဝဝ ဖုန်းများ ပေါ်ပေါက်သည်မှာ တစ်နှစ်ကျော်ကြာ ရှိလာပြီးဖြစ်သော်လည်း ယခင်ချပေးခဲ့သည့် ဆက်သွယ်ရေးဖုန်းကတ်များမှာ ဈေးကွက်အတွင်း ကျပ်သောင်းဂဏန်းမှ ကျပ်သိန်းဂဏန်းအထိ ရှိနေသေးကြောင်း သိရသည်။

“ဒီမှာက ဆင်းမ်ကတ်တွေကို မစို့မပို့ ရောင်းပေးလို့မရဘူး။ တစ်သက်လုံး ထမင်းငတ်လာတဲ့သူကို မဝတဝ သွားကျွေးသလို ဖြစ်မှာပေါ့။ ဒီမှာက တစ်သက်လုံး ဆင်းမ်ကတ်ငတ်လာခဲ့တာ” ဟု အိုင်တီပညာရှင် ကိုဝေဟင်မျိုးက ဆိုသည်။

လက်ရှိရောင်းချပေးနေသည့် ကျပ် ၁၅ဝဝ WCDMA ဖုန်းများမှာ ယခင်ကကဲ့သို့ စာချုပ်ပေးခြင်း မရှိတော့ဘဲ ပျောက်ဆုံးခဲ့ပါက အသစ်ပြန်လည်ထုတ်ပေးမည့် ဝန်ဆောင်မှုမျိုး မရရှိခြင်းကြောင့် သုံးစွဲသူများက ဝေဖန်ခဲ့ကြကြောင်း သိရသည်။ တရားဝင်ဈေးနှုန်းအရ ကျပ် ၁၅ဝဝ ဟု ဆိုသော်လည်း ကျပ်သောင်းချီအထိပေးကာ ဝယ်ယူရမှုများ ရှိနေသည်။

“ဆင်းမ်ကတ်ပျောက်၊ ပျက်ကိစ္စတွေက အရင်အတိုင်းပဲ ဆောင်ရွက်ပေးနေတုန်းပါ။ ဆင်းမ်ကတ်ပျက်ရင် ပြည်နယ်နဲ့တိုင်းဒေသကြီး အသီးသီးမှာရှိနေတဲ့ ဆက်သွယ်ရေးရုံးတွေကနေ အခမဲ့ ပြန်လဲပေးပါတယ်။ ပျောက်ရင်တော့ စာချုပ်လိုပြီး ကျပ်နှစ်သောင်း သွင်းရပါမယ်။ အဲဒါက အခု ၁၅ဝဝ ဖုန်းတွေမှာတော့ မရပါဘူး။ နောက်ထပ် ဆင်းမ်ကတ်အသစ် ဝယ်သုံးရပါမယ်” ဟု မြန်မာ့ဆက်သွယ်ရေးလုပ်ငန်းမှ တာဝန်ရှိသူက ပြောကြားသည်။

MPT အနေဖြင့် ဈေးကွက်အသာစီး ရထားသော်လည်း ပြုပြင်ပြောင်းလဲမှုများ နှေးကွေးပြီး ယခင်အမူအကျင့်ဟောင်းများကို အချိန်မီ ပြုပြင်နိုင်ခြင်း မရှိပါက အော်ပရေတာအသစ်များ၏ ကျော်တက်ခြင်းကို ကြုံတွေ့ရနိုင်ကြောင်း ကျွမ်းကျင်သူများက သုံးသပ်ကြသည်။ လက်ရှိ အချိန်အထိလည်း MPT ၏ ထူးခြားကောင်းမွန်သော ဝန်ဆောင်မှုအသစ်များကို မြင်တွေ့ရခြင်း မရှိသေးပေ။

“မြန်မာ့ဆက်သွယ်ရေးက နိုင်ငံခြားကုမ္ပဏီတွေနဲ့ ပေါင်းလာပြီဆိုတော့ နောက်ပိုင်းမှာ ဆက်သွယ်ရေးတွေ ပိုကောင်းလာမယ် ထင်တယ်။ ဒါပေမဲ့ အခုထိတော့ ဘာမှမထူးခြားသေးဘူး” ဟု အင်းစိန်မြို့နယ်တွင် နေထိုင်သူ ကိုသူရိန်ထက်က ပြောကြားသည်။

တယ်လီနောနှင့် အူရီဒူးတို့က ဖုန်းပြောခများကို တစ်မိနစ်လျှင် ၂၅ ကျပ်၊ ၃၅ ကျပ် သတ်မှတ်ကောက်ခံချိန်တွင် MPT က ဖုန်းပြောခကို တစ်မိနစ်လျှင် ၅ဝ ကျပ်သာ ဆက်လက်ကောက်ခံနေခြင်းမှာလည်း သုံးစွဲသူများအကြား ဝေဖန်စရာဖြစ်ခဲ့ကြောင်း သိရသည်။

တယ်လီနော၏ ဝန်ဆောင်ခနှုန်းထားများမှာ သင့်တင့်ကြောင်း သုံးစွဲသူအများစုက သုံးသပ်ခဲ့ကြပြီး နှစ်ပေါင်းများစွာ အမြတ်ငွေ ရရှိနေခဲ့သော မြန်မာ့ဆက်သွယ်ရေးလုပ်ငန်း၏ ဝန်ဆောင်ခနှုန်းထားများ လျော့ကျခြင်းမရှိသေးသည်မှာ စိတ်ပျက်စရာကောင်းကြောင်း သုံးစွဲသူများက ဝေဖန်ခဲ့ကြသည်။

အူရီဒူးက ဈေးကွက်လက်ဦးမှုရယူကာ အစောဆုံးရောင်းချခဲ့ပြီး ကနဦးတွင် ဆင်းမ်ကတ်ရောင်းချရမှု များပြားခဲ့သော်လည်း ဝန်ဆောင်မှုအရည်အသွေးနှင့် နှုန်းထားများကြောင့် နောက်ပိုင်းတွင် သုံးစွဲမှုလျော့ကျခဲ့ကြောင်း သိရသည်။

“နေ့စဉ်နဲ့အမျှ ကျွန်တော်တို့ရဲ့ ကွန်ရက်ကို ပိုမိုကောင်းမွန်အောင်၊ ကျယ်ပြန့်လာအောင် ဆောင်ရွက်နေကြပါတယ်။ သီတင်းတစ်ပတ်မှာ လူဦးရေ ငါးသိန်းအထိ တိုးချဲ့အသုံးပြုလာနိုင်အောင် ကွန်ရက်ဖြန့်ကြက်နေပါတယ်။ ကျွန်တော်တို့ နားစွင့်ထားပြီး သုံးစွဲသူတွေရဲ့ အကြံပြုချက်တွေကို တုံ့ပြန်နေပါတယ်။ ဆက်လက်တိုးတက်အောင်လည်း ဆောင်ရွက်နေပါတယ်” ဟု အူရီဒူးမြန်မာ၏ အမှုဆောင်အရာရှိချုပ် Ross Cormack က ဆိုသည်။

လတ်တလောတွင် အူရီဒူးရော တယ်လီနောပါ အခြေခံအဆောက်အအုံပိုင်းနှင့် ကွန်ရက်ဖြန့်ကြက် လွှမ်းခြုံနိုင်မှု အပိုင်းများတွင် မြန်မာ့ဆက်သွယ်ရေးလုပ်ငန်းကို ယှဉ်ပြိုင်နိုင်ရန် အခက်အခဲ ရှိနေသေးပြီး ရာခိုင်နှုန်း ၉ဝ ကျော်ခန့် လွှမ်းခြုံနိုင်ရန် ငါးနှစ်ခန့် အချိန်ယူလုပ်ဆောင်ရမည်ဖြစ်ကြောင်း တယ်လီနောနှင့် အူရီဒူးက ဆိုထားသည်။

တယ်လီနောက မန္တလေး၊ နေပြည်တော်၊ ရန်ကုန်တို့တွင် ဝန်ဆောင်မှုစတင်ပြီးနောက် ဒီဇင်ဘာလအတွင်း ဧရာဝတီတိုင်း၊ ပဲခူးတိုင်း၊ မကွေးတိုင်း၊ စစ်ကိုင်းတိုင်း၊ ကရင်ပြည်နယ်၊ မွန်ပြည်နယ်၊ ရှမ်းပြည်နယ်တို့တွင် စတင်အသုံးပြုနိုင်ရန် မျှော်မှန်းထားကြောင်း သိရသည်။

တယ်လီနော၏ ဝန်ဆောင်မှုများ စတင်မိတ်ဆက်ချိန်တွင် အူရီဒူးနှင့် မြန်မာ့ဆက်သွယ်ရေးလုပ်ငန်းတို့၏ နှုန်းထားများထက် ပိုမိုသက်သာခဲ့ပြီး ဝန်ဆောင်မှုအရည်အသွေးကိုသာ ဆက်လက်စောင့်ကြည့်ရမည် ဖြစ်သည်။



“မန္တလေးမှာ စရောင်းတဲ့အခါ 2G ကတော့ အရမ်းကောင်းပါတယ်။ 3G ကတော့ Downtown တွေမှာရမယ်။ ပြောရရင် 2G က သုံးစွဲမှု ဘယ်လောက်များများ ကျုံ့မသွားဘူး။ 3G ကတော့ သုံးစွဲမှုအရမ်းများရင် ကွန်ရက်က သေးသွားတယ်။ ကွန်ရက်တွေ တိုးချဲ့တိုင်းမှာ ဝန်ဆောင်မှုရနိုင်မယ့် မြို့တွေကို ကြိုတင်ကြေညာပေးသွားမှာ ဖြစ်ပါတယ်” ဟု တယ်လီနောမြန်မာ၏ အမှုဆောင်အရာရှိချုပ် Mr. Petter Furberg က ပြောကြားသည်။

တယ်လီနောဆင်းမ်ကတ်များကို စက်တင်ဘာ ၂၇ ရက်က မန္တလေးတွင် စတင်ရောင်းချရာ ဝယ်ယူသူ များပြားခဲ့ကြောင်း သိရသည်။ မကြာမီကာလတွင် နေပြည်တော်နှင့် ရန်ကုန်တို့၌လည်း ဆက်လက်ရောင်းချမည်ဖြစ်ရာ လူဦးရေများပြားသော ရန်ကုန်တွင် လုံလောက်သောကွန်ရက် ရရှိရေးအတွက် တည်ဆောက်ဆဲတာဝါတိုင်များ အလျင်အမြန်ပြီးစီးရန် အပြင်းအထန် ကြိုးပမ်းနေရကြောင်း သိရသည်။

အူရီဒူးမှာလည်း ကွန်ရက်ပိုမို ဖြန့်ကျက်နိုင်ရန်အတွက် တာဝါတိုင်များ ထပ်မံတည်ဆောက်လျက်ရှိပြီး မြန်မာ့ဆက်သွယ်ရေး လုပ်ငန်းမှာလည်း ဆင်းမ်ကတ်များကို တိုးမြှင့်ရောင်းချနိုင်ရန် တာဝါတိုင်အသစ်များ စိုက်ထူခြင်း၊ ရှိပြီးသားတာဝါတိုင်များကို အဆင့်မြှင့်တင်ခြင်းများ ဆောင်ရွက်နေကြောင်း သိရသည်။

နောက်ဆုံးကျန်ရှိသည့် ရတနာပုံတယ်လီပို့မှာ ပူးပေါင်းမည့် ကုမ္ပဏီကို ထုတ်ပြန်ကြေညာနိုင်ခြင်း မရှိသေးဘဲ လိုင်စင်တင်ခြင်းများကိုလည်း မဆောင်ရွက်နိုင်သေးသောကြောင့် လာမည့် ၂ဝ၁၅ ခုနှစ် အတွင်း၌သာ ဆင်းမ်ကတ်များကို စတင်ရောင်းချနိုင်မည်ဖြစ်ကြောင်း သိရသည်။

ဆက်သွယ်ရေးအော်ပရေတာများ အနေဖြင့် ဈေးကွက်ယှဉ်ပြိုင်မှု ရှိလာသောကြောင့် သက်သာသောဈေးနှုန်းနှင့် ကောင်းမွန်သော ဝန်ဆောင်မှုအရည်အသွေးတို့ကို သုံးစွဲသူများ မျှော်လင့်လာနိုင်ပြီဖြစ်ကာ လာမည့်နှစ်များအတွင်း မြန်မာနိုင်ငံ၏ ဆက်သွယ်ရေးကဏ္ဍမှာ သိသာထင်ရှားသော အပြောင်းအလဲများကို ပိုမိုမြင်တွေ့လာနိုင်ဖွယ်ရှိကြောင်း ကျွမ်းကျင်သူများက သုံးသပ်ခဲ့ကြသည်။


Eleven Media Group

0 comments:

Post a Comment